मुंबई (वृत्तसंस्था) विख्यात ब्रिटीश अभिनेते आणि बॉन्डपटांचे एकेकाळचे नायक ‘सीन कॉनेरी’ यांची आज पुण्यतिथी आहे. सिनेक्षेत्रातील काही दशकांच्या कारकिर्दीमध्ये कॉनेरी यांनी अनेक गाजलेल्या चित्रपटांमध्ये अभिनय केला. दरम्यान, मनसे अध्यक्ष ‘राज ठाकरे’ यांनी कॉनेरी यांना ट्विटच्या माध्यमातून श्रद्धांजली वाहिली आहे. “आजही माझे सगळ्यात आवडते बॉन्ड नट हे ‘सीन कॉनेरी’च आहेत, अशा शीन कॉनरी ह्या प्रतिभाशाली कलावंताच्या स्मृतीस माझी विनम्र श्रद्धांजली”, असं राज ठाकरे म्हणाले.
‘जेम्स बॉण्ड’ फेम अभिनेते शॉन कॉनरी यांच्या निधनानंतर जगभरातून त्यांना श्रद्धांजली वाहिली जात आहे. राज ठाकरे यांनी कॉनरी यांच्यासाठी खास फेसबुक पोस्ट लिहिली आहे. त्यातून त्यांनी कॉनरी यांच्या अभिनय क्षमतेबद्दल सांगतानाच ‘जेम्स बॉण्ड’ म्हणून कॉनरीच बेस्ट का होते, हेही त्यांनी सांगितलं आहे. आपल्या पोस्टमध्ये राज ठाकरे लिहितात, ‘गॉडफादर म्हटलं की मार्लन ब्रँडो ह्यांचाच चेहरा जसा डोळ्यासमोर येतो तसं जेम्स बॉण्ड म्हणलं की बॉन्डपटांच्या चाहत्यांना शॉन कॉनरीच आठवतात. शॉन कॉनरी ह्यांनी सहा बॉण्डपट केले, पण त्या बॉण्डपटातील जेम्स बॉण्ड त्यांनी इतका घट्ट रुजवला की त्यामुळे पुढे जेम्स बॉण्ड साकारणाऱ्या प्रत्येक नटाची दमछाक झाली. प्रतिभा आणि प्रतिमेच्या संगमाच्या जोरावर एखाद्या देशाची सॉफ्ट पॉवर निर्माण होणं आणि ती अनेक दशकं टिकणं हे जगातील दुर्मिळ उदाहरण असावं. सगळे लोभ, मोह हे मलाही सुटले नाहीत हे दाखवत त्यांनी ‘जेम्स बॉन्ड’ला वास्तवाच्या जगात घट्ट रोवून उभं केलं, हे शॉन कॉनरी ह्यांचं यश. म्हणूनच आजही माझे सगळ्यात आवडते बॉण्ड नट हे शॉन कॉनरीच आहेत. शॉन कॉनरी ह्यांच्या स्मृतीस माझी विनम्र श्रद्धांजली.
