चाळीसगाव (प्रतिनिधी) वरिष्ठ पोलीस अधिकारी आणि न्यायपालिकेतील वरिष्ठांच्या नावाने सुपारी व्यापाऱ्यांकडून खंडणी उकळल्याप्रकरणी चाळीसगावातून आणखी एकाला नागपूर पोलिसांनी अटक केल्यामुळं प्रचंड खळबळ उडाली आहे.
नागपुरातील सुपारी व्यापारी अनुप महेशचंद्र नगरिया यांच्याकडून ३० लाखांची खंडणी उकळल्याप्रकरणी चाळीसगावातून संजय मंधानी याला नागपूर पोलिसांनी अटक केली आहे. यापूर्वी चाळीसगावच्याच संतोष मानधनिया यांच्यासह मुख्य सुत्रधार सौरभ केसवानीला अटक करण्यात आली होती.
आतापर्यंत खान्देशातील तिघांसह सहा जणांना अटक
दरम्यान, गुरुवारी सौरभला अटक केल्यावर शुक्रवारी त्याला न्यायालयासमोर हजर करण्यात आले. न्यायालयाने सौरभला दि. २२ फेब्रुवारीपर्यंत कोठडीत ठेवण्याचे आदेश दिले. या खंडणी प्रकरणाचा म्होरक्या सौरभ केसवानी (रा. सिंधी कॉलनी, जळगाव), हवाला चालक संतोष मानधनिया व संजय मंधानी (रा. चाळीसगाव) या खान्देशातील तिघांसह सहा जणांना आतापर्यंत अटक करण्यात आली आहे. मानधनिया मंधानी व या हवालाचालकांकरवी खंडणीची ३० लाखांची रोकड सौरभकडे पोहचती झाली होती. त्यासाठी गुजरातमधील नरेश परमार आणि रतन राणा यांनीही मदत केली होती. त्या दोघांसह नागपुरातील वाईन शॉपचे संचालक अशोक वंजानी यांनाही अटक करण्यात आली होती.
