जळगाव (प्रतिनिधी) बेकायदा शस्त्र बाळगून गंभीर गुन्ह्याच्या तयारीत असलेल्या दोन तरूणांना स्थानिक गुन्हे शाखेने अटक केली आहे. दोघांविरुद्ध तालुका पोलीस ठाण्यात गुन्हा नोंदविण्यात आला आहे.
शहरातील वैष्णवी पार्ककडे जाणाऱ्या रोडवरील मातोश्री शाळेजवळ एका तरूणाच्या हातात चॉपर असल्याची गोपनीय माहिती स्थानिक गुन्हे शाखेचे पोलीस निरीक्षक किरणकुमार बकाले यांना मिळाली होती. त्यानुसार स्थानिक गुन्हे शाखेच्या पथकाने आज दुपारी १ वाजेच्या सुमारास मातोश्री शाळेजवळून संशयित आरोपी पवन नारायण कापसे (वय-२५ रा. वैष्णवी पार्क, मातोश्री शाळेजवळ) याला अटक केली. पोलिसांनी त्याची कसून चौकशी केली असता त्याने हा चॉपर मित्र परेश आनंदा गोयर (वय-२६ रा. वैष्णवी पार्क) याच्याकडून घेतला असल्याचे सांगितले. स्थानिक गुन्हे शाखेच्या पथकाने तालुका पोलीस ठाण्यात दोघांविरोधात गुन्हा नोंदविला आहे. दरम्यान, पोलीस निरीक्षक किरणकुमार बकाले यांच्या मार्गदर्शनाखाली सहाय्यक फौजदार राजेंद्र पाटील, अशोक महाजन, पोहेकॉ सुधाकर अंबोरे, अनिल देशमुख, अशरफ शेख, दिपक शिंदे, इंद्रिस पठाण यांच्या पथकाने ही कारवाई केली.
