जळगाव (प्रतिनिधी) शहरातील पोलनपेठ परिसराचे ‘महात्मा फुले नगर’ असे नामकरण अन्न, नागरी पुरवठामंत्री छगनराव भुजबळ यांनी केले. याप्रसंगी व्यासपीठावर महापौर सौ.जयश्री सुनिल महाजन, चोपड्याच्या आमदार लताताई सोनवणे, उपमहापौर कुलभूषण पाटील, नगरसेवक विष्णू भंगाळे, नितीन लढ्ढा, सीमा भोळे, शिवसेनेचे जळगाव लोकसभा सहसंपर्कप्रमुख गुलाबराव वाघ, लोकसंघर्ष मोर्चाच्या अध्यक्षा प्रतिभा शिंदे यांच्यासह आदी मान्यवर उपस्थित होते.
शहरातील पूर्वीचा मध्यवर्ती भाग असलेल्या महात्मा फुले मंडई या भागाचे नाव बदलून ब्रिटीश अधिकारी पोलन याच्या नावावरून पोलनपेठ असे करण्यात आले होते. हे नाव पुन्हा बदलून आता ‘महात्मा फुले नगर’ करण्यात आले आहे. यासाठी माळी महासंघाने पुढाकार घेतला होता. कार्यक्रमाच्या सुरूवातीला माळी महासंघातर्फे छगन भुजबळ यांचे डोक्यावर महात्मा फुलेंची पगडी घालून भला मोठा पुष्पहार देऊन जोरदार स्वागत करण्यात आले. त्यानंतर महापौर जयश्री सुनिल महाजन व उपमहापौर कुलभूषण पाटील यांनी छगन भुजबळ यांचे महापालिकेतर्फे पुष्पगुच्छ देऊन स्वागत केले. नामकरण कोनशिलेचे अनावरण महापौरांच्या हस्ते झाले.
