जळगाव (प्रतिनिधी) भाजपाचे ज्येष्ठ नेते एकनाथराव खडसे यांची कार्यकर्त्यांसोबत पक्षांतर बाबत झालेल्या संवादाची क्लिप व्हायरल झाल्यानंतर जिल्ह्यात एकच खळबळ उडाली आहे. याबाबत राष्ट्रवादीचे जिल्हाध्यक्ष यांनी मोजक्या परंतु सुचत शब्दात ‘द क्लियर न्यूज’ला प्रतिक्रिया दिली आहे.
भुसावळ तालुक्यातील वरणगाव येथील रोशन भंगाळे या एका कार्यकर्त्याने एकनाथ खडसे यांच्याशी संपर्क साधून पक्ष सोडण्याची विनंती केली. दरम्यान, या चर्चेची ऑडिओ क्लीप सोशल मीडियावर व्हायरल झाल्यामुळे चांगलीच खळबळ उडाली आहे. या क्लिपमध्ये वरणगाव येथील एक कार्यकर्ता ‘भाऊ राष्ट्रीय कार्यकारणीतही डावलण्यात आले आहे. भाऊ, आपला काहीतरी निर्णय घ्या, आतापण त्यांनी तुम्हाला काही नाही दिले, पंकजा मुंडेंना दिलं…आता पक्ष सोडा व योग्य निर्णय घ्या, अशी विनंती करतो. त्यावर खडसे अरे जाणार आहे, पण शेवटी पद-बिद काहीतरी ठरलं पाहिजे की नाही. दुसरीकडे काय पद मिळते, ते तर बघू दे. दुसरीकडे जाऊन का नुसतेच बसायचे, काही तरी पद मिळाले पाहिजे की नाही, असे सांगत महिनाभरात निर्णय घेणार असल्याचे कार्यकर्त्याला सांगतात. दरम्यान, माझ्यासारखा आवाज काढणारे महाराष्ट्रात भरपूर आहेत. हा आवाज माझा नाही, असे म्हणत एकनाथ खडसे यांनी माध्यमांशी याविषयी बोलण्यास नकार दिला.
दरम्यान, या व्हायरल क्लिपबाबत राष्ट्रवादीचे जिल्हाध्यक्ष रवींद्र भैय्या पाटील यांच्याशी संपर्क साधला असता त्यांनी सांगितले की एकनाथराव खडसे हे राज्याचे माजी मंत्री आहेत ज्येष्ठ नेते आहेत. याबाबत राष्ट्रावादी काँग्रेस अध्यक्ष शरद पवार, प्रदेशाध्यक्ष जयंत पाटील खासदार सुप्रियाताई सुळे अजित दादा पवार हेच निर्णय घेतील
