नवी दिल्ली (वृत्तसंस्था) केंद्र सरकारने आता वाहन चालकांची मोठ्या त्रासातून मुक्तता केली आहे. ड्रायव्हिंग लायसन्स (Driving license) काढण्यासाठी यापुढे प्रादेशिक परिवहन कार्यालयात (RTO) जावं लागणार नाही. कारण सरकारने ड्रायव्हिंग लायसन्स बनवण्याचे नियम अतिशय सोपे केले आहेत.
या नियमांनुसार लायसन्स काढण्यासाठी ड्रायव्हिंग चाचणी आवश्यक असणार नाही. कारण सरकारने ड्रायव्हिंग लायसन्सच्या नियमांमध्ये सुधारणा केल्यानुसार, वाहन परवानासाठी RTO मध्ये जाऊन कोणतीही ड्रायव्हिंग टेस्ट देण्याची गरज नसल्याची माहिती केंद्रीय रस्ते वाहतूक आणि महामार्ग मंत्रालयाकडून देण्यात आली आहे. तसंच ड्रायव्हिंग लायसन्स RTOच्या वेटिंग लिस्टमध्ये आहेत त्यांनाही यातून दिलासा मिळणार आहे.
केंद्रीय रस्ते वाहतूक, महामार्ग मंत्रालयाने दिलेल्या माहितीनुसार, आता तुम्हाला ड्रायव्हिंग लायसन्स मिळवण्यासाठी RTO मधील चाचणीची वाट पाहावी लागणार नाही. शिवाय आता कोणत्याही मान्यताप्राप्त ड्रायव्हिंग ट्रेनिंग स्कूलमध्ये ड्रायव्हिंग लायसन्ससाठी नोंदणी करू शकतो. मात्र, ड्रायव्हिंग चाचणी उत्तीर्ण करावी लागणार आहे. जे अर्जदार ड्रायव्हिंग स्कूलमध्ये प्रशिक्षण देणाऱ्या संस्थेकडून प्रमाणपत्र प्राप्त करतील त्यांना या प्रमाणपत्राच्या आधारे, लायसन्स देण्यात येणार आहे.
सरकारचे नवीन नियमावली
दुचाकी, तीनचाकी व हलकी मोटार वाहनांसाठी प्रशिक्षण केंद्रांजवळ किमान एक एकर जागा असणे बंधनकारक आहे.
मध्यम आणि जड प्रवासी मालवाहू वाहने किंवा ट्रेलरसाठी केंद्रांसाठी दोन एकर जमीन आवश्यक आहे.
प्रशिक्षक १२वी उत्तीर्ण असावा तसेच त्याला ५ वर्षांचा ड्रायव्हिंगचा अनुभव असावा.
हलकी मोटार वाहने चालवण्यासाठी, कोर्सचा कालावधी जास्तीत जास्त ४ आठवडे असेल.
ड्रायव्हिंग सेंटर्सचा अभ्यासक्रम २ टप्प्यांमध्ये विभागला जाईल. थेअरी आणि प्रॅक्टिकल
थेअरी टप्पा संपूर्ण अभ्यासक्रमाच्या ८ तासांचा असेल, त्यामध्ये रस्त्यावरील मार्गदर्शक सूचना समजून घेणे, वाहतूक शिक्षण, अपघातांची कारणे समजून घेणे, प्रथमोपचार आणि वाहन चालविण्याची इंधन कार्यक्षमता यांचा समावेश असेल. तसंच लोकांना सामान्य रस्ते, ग्रामीण रस्ते, महामार्ग, शहरातील रस्ते, रिव्हर्सिंग आणि पार्किंग, चढ-उतारावर वाहन चालवायला शिकण्यासाठी २१ तास घालवावे लागणार आहेत.
