जळगाव (प्रतिनिधी) आमच्या एरियात आम्ही दादा आहोतच, पण आता या एरियात दादागिरी करायची आहे, असे म्हणत तीन तरुणांनी मू. जे. महाविद्यालय परिसरातील चाय सुट्टा बार या हॉटेलमध्ये तिघांनी पिस्तूलचा धाक दाखवत दहशत माजविण्याचा प्रयत्न केल्याचा प्रकार घडला. स्थानिक गुन्हे शाखेच्या पथकाने यापैकी दोन जणांना ताब्यात घेतले आहे. संदीप उर्फ डॉन मधुकर निकम (वय २३), अंकुश मधुकर सुरवाडे (वय २५), अशी आरोपींची नावे आहेत.
संपूर्ण घटना सीसीटीव्ही कॅमेऱ्यात कैद
याबाबत सुत्रांनी दिलेल्या माहितीनुसार, मू. जे. महाविद्यालय परिसरातील विठ्ठल मंदिर चौकातील पार्श्वनाथ संकुलात ‘चाय सुट्टा बार नावाने व्यवसाय सुरु झालेला आहे. येथे दुपारी अडीच वाजता तीन तरुण आले. त्यापैकी एकाने मॅनेजर ओम गुरुदास शामनानी (रा. गणपती नगर) व विवेक संजय महाजन या दोघांना कंबरेला लावलेला गावठी पिस्तूल दाखवत आमच्या एरियात आम्ही दादा आहोत, आता या एरियात आम्हाला दहशत माजवायची आहे, असे म्हणत वरच्या मजल्यावर गेले. तेथे बसलेल्या तरुण तरुणींना दादागिरी करुन बाहेर काढले. ही संपूर्ण घटना सीसीटीव्ही कॅमेऱ्यात कैद झाली आहे.
व्यावसायिकांसह ग्राहकांमध्ये भीतीचे वातावरण
हॉलमध्ये बसलेल्या तरुण-तरुणी व इतर ग्राहकांनी घाबरुन तेथून पाय काढला. सर्व जण गेल्यानंतर तिघांनी फर्मान सोडत जागेवर ग्लास, पिझ्झा व पाण्याची बाटली मागवली. एका टेबलावर बसून तेथे मद्य प्राशन केले. काही वेळ थांबल्यानंतर तिघे जण खाली आले. ९० रुपयांचे बिल अदा करुन पुन्हा दहशत माजविली. यावेळी प्रचंड गर्दी झाली होती. या प्रकारामुळे व्यावसायिकांसह ग्राहकांमध्ये भीतीचे वातावरण पसरले होते. मॅनेजर ओम गुरुदास शामनानी (रा. गणपती नगर) व विवेक संजय महाजन यांनी रामानंद नगर पोलीस ठाण्यात माहिती दिली. सायंकाळी उपनिरीक्षक गोपाळ देशमुख, दीपक शिरसाठ यांच्यासह स्थानिक गुन्हे शाखेच्या कर्मचाऱ्यांनी घटनास्थळी धाव घेतली. सीसीटीव्ही फुटेज तपासले असता त्यात तिघे जण कैद झाले आहेत. त्या आधारावर पोलिसांनी तिघांचा शोध घेतला.
दोघांना घेतले ताब्यात
स्थानिक गुन्हे शाखेचे विजयसिंग पाटील, जितेंद्र पाटील, प्रितम पाटील, नितीन बाविस्कर, अक्रम शेख व राहुल पाटील यांनीही सीसीटीव्ही फुटेज तपासले. फुटेज घेऊन रेकॉर्डवरील गुन्हेगारांच्या मदतीनेच तिघांचे नाव निष्पन्न केले. त्यापैकी संदीप उर्फ डॉन मधुकर निकम (वय २३), अंकुश मधुकर सुरवाडे (वय २५, दोन्ही रा. गेंदालाल मिल) या दोघांना ताब्यात घेतले. दिनेश पवार पसार झाला आहे.
