मुक्ताईनगर प्रतिनिधी । भारताचे पंतप्रधान नरेंद्र मोदी यांच्या वाढदिवसानिमित्त सेवा सप्ताहाचे आयोजन करण्यात आले होते. त्यानिमित्त शहरात भारतीय जनता पक्ष मुक्ताईनगर तर्फे उपजिल्हा रुग्णालय मुक्ताईनगर आणि संजिवनी हॉस्पिटलमध्ये रुग्णांना फळ वाटप करण्यात आले.
तसेच सिव्हिल सर्जन डॉ. एन. एस. चव्हाण यांचा आणि इतर डॉक्टर यांचा रोहिणी खडसे खेवलकर अध्यक्षा असलेल्या संवेदना फाउंडेशनतर्फे कोरोना योद्धा म्हणून सत्कार करण्यात आला. माजी महसुल कृषी मंत्री एकनाथरावजी खडसे यांच्या हस्ते गरीब आदिवासी पावरी बांधवांना ब्लॅंकेट आणि शाल वाटप करण्यात आले तसेच वृक्षारोपण करण्यात आले. यावेळी जळगाव जिल्हा मध्यवर्ती सह बँकेच्या अध्यक्षा रोहिणी ताई खडसे खेवलकर, कृषी उत्पन्न बाजार समिती सभापती निवृत्ती पाटील, भाजप तालुकाध्यक्ष रामभाऊ पाटील, माजी सभापती विलास धायडे, सरचिटणीस चंद्रकांत भोलाने, भाजयुमो तालुकाध्यक्ष अंकुश चौधरी, माजी सरपंच प्रविणपाटील, नगरसेवक निलेश शिरसाट, डॉ. प्रदीप पाटील, मस्तान कुरेशी, बापू ससाणे, अनिल पाटील, दिपक साळुंखे, निलेश मालवेकर, शिवराज पाटील, भैय्या पाटील, गौरव बाभुलकर भाजपा पदाधिकारी कार्यकर्ते उपस्थित होते.
यावेळी मार्गदर्शन करताना एकनाथराव खडसे म्हणाले, पंतप्रधान नरेंद्र मोदी यांच्या रूपाने भारताला एक कणखर नेतृत्व लाभले आहे. त्यांच्या नेतृत्वाखाली देश चौफेर प्रगती करत आहे. मोदींजींच्या मोदीजी यांनी मे 2014 मध्ये कार्यभार स्वीकारल्यापासून सर्वंकष आणि सर्वसमावेशक विकासाच्या अशा मार्गावर वाटचाल सुरू केली आहे. जिथे प्रत्येक भारतीय त्याच्या आशा-आकांक्षा पूर्ण होऊ शकतील. अंत्योदय अर्थात शेवटच्या व्यक्तीपर्यंत सेवा पोहोचवून त्याचा विकास करण्याच्या तत्त्वाने मोदीजी सर्वाधिक प्रेरित आहेत.
अभिनव कल्पना आणि उपक्रमांच्या माध्यमातून प्रगतीची चाके जलद गतीने फिरतील आणि विकासाची फळे प्रत्येक नागरिकांपर्यंत पोहोचतील याची मोदींजींच्या नेतृत्वाखालील सरकारने खबरदारी घेतली आहे. सरकार आता अधिक खुले, सुलभ आणि पारदर्शक बनले आहे. नरेंद्र मोदी हे एक ‘लोकनेते’आहेत. लोकांच्या समस्या सोडवण्यासाठी आणि त्यांच्या जीवनमानात सुधारणा आणण्यासाठी त्यांनी स्वत:ला वाहून घेतले आहे. त्यांना लोकांमध्ये राहायला, त्यांच्या आनंदात सहभागी व्हायला आणि त्यांची दु:खं दूर करण्यात समाधान मिळते.
मोदीजी व्यक्ती, साहस, करूणा आणि विश्वासाची साकार मूर्ती आहे. भारताचे नवनिर्माण करण्याच्या तसेच त्याला जगासाठी दीपस्तंभ बनवण्यासाठी नरेंद्र मोदीजी सदैव कार्यरत असतात.
