धरणगाव (प्रतिनिधी) राष्ट्रवादी काँग्रेसचे अध्यक्ष तथा माजी केंद्रीय कृषिमंत्री शरदचंद्रजी पवार साहेबांच्या वाढदिवसाचे औचित्य साधून सामाजिक कार्यकर्ते तथा पाटील समाज पंच मंडळ, लहान माळी वाडा धरणगावचे अध्यक्ष भिमराज पाटील व त्यांच्या मित्र परिवाराच्या वतीने “सहवास – अ केअर” संस्थेतील विशेष मुलांसाठी स्नेहभोजनाचा कार्यक्रम उत्साहात संपन्न झाला.
याबाबत सविस्तर माहिती अशी की, १२ डिसेंबर रोजी राष्ट्रवादी काँग्रेसचे अध्यक्ष शरदचंद्रजी पवार साहेबांच्या वाढदिवसाच्या निमित्ताने समाजातील शोषित – वंचितांचा विचार करून काहीतरी लोकोपयोगी कार्यक्रम घ्यावा, असा विचार भिमराज पाटील यांच्या मित्र परिवाराने केला. चर्चेअंती असा निष्कर्ष निघाला की, “सहवास – अ केअर” या संस्थेतील विशेष मुलांना स्नेहभोजन आणि संस्थेला विशेष भेट द्यावी असे ठरले. त्यानुसार लगेचच “सहवास” संस्थेचे अध्यक्ष समाधान सावंत यांच्याशी संवाद साधला व १२ तारखेला संस्थेतील मुलांना दोन्ही वेळेच भोजन देण्याचं ठरलं. या नियोजनाची यशस्वीरीत्या अंमलबजावणी करत दुपारी मसाले भात व जिलेबी आणि रात्री वरण – भात, पुऱ्या, भाजी व गुलाबजाम अशा पद्धतीने स्वादिष्ट जेवण देण्यात आले. त्याचप्रमाणे संस्थेला विशेष आठवण भेट देखील देण्यात आली. साहेबांच्या वाढदिवसाच्या निमित्ताने अतिशय स्तुत्य असा कार्यक्रम संपन्न झाला. पावसाचा व्यत्यय आल्यामुळे भिमराज पाटील व त्यांच्या मित्र परिवाराला प्रत्यक्ष संस्थेत जाता आले नाही परंतु ठरल्याप्रमाणे स्नेहभोजन कार्यक्रम पार पडला. स्नेहभोजन देणाऱ्या चौधरी केटरर्स यांना डिजिटल पद्धतीने पेमेंट देण्यात आले. कार्यक्रमाच्या यशस्वीतेसाठी “सहवास – अ केअर” संस्थेच्या टीमने परिश्रम घेतले.
