नाशिक (वृत्तसंस्था) धावत्या एसटी बसमध्ये हृदयविकाराचा तीव्र (Bus driver Dies Of Heart Attack) झटका आल्याने चालकाचा मृत्यू झाल्याची घटना तिळवण रस्त्यावर घडली. मोठाभाऊ छगन सोनवणे (४० रा. चिंचवड, ता. मालेगाव) असे मृत चालकाचे नाव आहे.
सोनवणे सोमवारी सकाळी साडेअकराच्या सुमारास सटाणा- तिळवण बसवर चालक म्हणून कर्तव्यावर होते. बस चालवित असताना तिळवण गावानजीक छातीत अचानक कळ आल्याने त्यांनी तत्काळ बस थांबवून कंडक्टर कारभारी पवार यांना आवाज दिला. त्यांना छातीत असह्य वेदना जाणवू लागल्या. खबरदारी म्हणून पुढील स्थानकात त्यांनी बस चालविण्याची जबाबदारी दुसऱ्यावर सोपवली. मात्र, हृदयविकाराचा झटका इतका तीव्र होता की ते बसमध्येच कोसळले. कंडक्टर पवार यांनी बेशुद्ध अवस्थेत असलेल्या सोनवणे यांना उचलून बस थेट रुग्णालयात नेली. परंतु, हृदयविकाराच्या झटक्याने त्यांचे निधन झाले.
