रावेर (प्रतिनिधी) आईला अश्लील बोलण्याच्या वादातून संतप्त झालेल्या मुलाने एक व्यक्तीच्या डोक्यात तलवारीने वार केल्याची घटना घडली होती. त्या व्यक्तीचा आज मृत्यू झाला. याप्रकरणी रावेर पोलीस ठाण्यात गुन्ह्याची नोंद करण्यात आली असून आरोपीस अटक केली आहे.
याबाबत अधिक माहिती अशी की, रावेर शहरातील संभाजीनगर भागात वास्तव्यास असलेले राजू देवराम चौधरी (वय ५५) हे पुष्पाबाई मराठे यांना अश्लील शब्द बोलले. अश्लील शब्द बोलण्याच्या कारणावरून पुष्पाबाई यांचा मुलगा रविंद्र संतोष मराठे याने रागाच्या भरात तलवारीने राजू चौधरी यांच्या डोक्यावर वार करत गंभीर जखमी केले. सदर घटना सोमवारी (ता. १३) रात्री उशिरा घडली. जखमीला जळगाव येथे खासगी रुग्णालयात उपचारार्थ दाखल करण्यात आले. उपचार सुरू असतांना राजु चौधरी यांचे आज निधन झाले.
याप्रकरणी मयताचा भाऊ गणेश चौधरीच्या फिर्यादीवरून रावेर पोलीसात संशयित संतोष मराठे यांच्या विरोधात खुनाचा गुन्हा दाखल करण्यात आला आहे. पोलीसांनी त्यास अटक केली आहे. त्यास येथील न्यायालयासमोर उभे केले असता न्यायालयाने तिन दिवसाची पोलीस कोठडी दिली आहे. याप्रकरणी सहाय्यक पोलीस निरीक्षक शितलकुमार नाईक पुढील तपास करीत आहेत.
