अमरावती (वृत्तसंस्था) आई-वडील शेतात सोयाबीन कापणी करत असताना दुसरीकडे शेतातच खेळत असलेल्या एका दीड वर्षीय चिमुकलीला ट्रॅक्टरने चिरडल्याची दुर्दैवी घटना मंगळवार, १७ ऑक्टोबर रोजी सकाळी ७.३० वाजताच्या सुमारास रसुल्लापूर शिवारात घडली. या प्रकरणी दोघांविरुद्ध गुन्हा दाखल करण्यात आला आहे.
जया सुमेश बारस्कर असे मृतक चिमुकलीचे नाव आहे. सुमेश लक्ष्मण बारस्कर (२६) व त्यांची पत्नी संगीता हे दोघे मंगळवारी सकाळी रसुल्लापूर शिवारातील निशिकांत भेटाळू यांच्या शेतात सोयाबीन कापणीच्या कामाला गेले होते. यावेळी त्यांच्यासोबत चिमुकली मुलगी जयासुद्धा होती. सुमेश व त्यांची पत्नी संगीता हे दोघे सोयाबीन कापणी करीत असताना चिमुकली जया ही शेतात खेळत होती. त्याचवेळी सुमेश यांना चिमुकल्या जयाचा आवाज ऐकू आला. त्यामुळे त्यांनी आवाजाच्या दिशेने धाव घेतली.
यावेळी त्यांना जया ही ट्रॅक्टरमध्ये फसलेली दिसली. अंगावरून ट्रॅक्टर गेल्याने तिचा मृत्यू झाला होता. त्यानंतर घटनेची माहिती आसेगाव पूर्णा पोलिसांना देण्यात आली. पोलिसांनी घटनास्थळ गाठून पंचनामा केला. या प्रकरणी सुमेश बारस्कर यांच्या तक्रारीवरून पोलिसांनी अल्पवयीन ट्रॅक्टर चालक व मालक यांच्याविरुद्ध गुन्हा दाखल करण्यात आला आहे.
