नाशिक (वृत्तसंस्था) पक्षाकडून दिली जाणारी उमेदवारी रद्द केली जाईल, अशी धमकी देत ५० लाखांची खंडणी मागणाऱ्या दिल्लीतील दोघा तोतया प्रधान सचिवांना नाशिक पोलिसांनी बेड्या ठोकल्या आहेत. पंतप्रधान कार्यालयातून बोलत असल्याचे भासवून भामट्यांनी शहरातील एका लोकप्रतिनिधीकडून खंडणी उकळण्याचा प्रयत्न केला होता.
शहर गुन्हे शाखेच्या युनिट १ च्या पथकाने दिल्ली गाठून दोघा संशयितांच्या मुसक्या आवळल्या आहेत. कर्नाटक निवडणूक काळात याच प्रकारच्या धमकीमुळे मोठी रक्कम पदरात पडल्याने संशयितांनी महाराष्ट्र विधानसभा निवडणुकीकडे आपला मोर्चा वळवल्याचे तपासात पुढे आले आहे. संशयितांना न्यायालयाने सोमवार, २८ ऑक्टोबरपर्यंत पोलीस कोठडी सुनावली आहे. सर्वेश मिश्रा ऊर्फ शिवा ऊर्फ दिनू सुरेंद्र मिश्रा (रा. प्रताप विहार खोडा कॉलनी, गाझियाबाद उत्तर प्रदेश) व गौरवनाथ बहादुरसिंग नाथ (रा. घडोली गाव, दिल्ली) अशी संशयित ठकबाजांची नावे आहेत.
दिल्लीत महाविद्यालयीन शिक्षण घेणाऱ्या दोघा भामट्यांनी कर्नाटक राज्यात झालेल्या निवडणूक काळात ठकबाजीचा हा फॉर्म्युला वापरला होता. बंगळुरू येथील लोकप्रतिनिधीला निवडणुकीत पक्षाचे तिकीट कापण्याची धमकी देत, संशयितांनी त्याला त्यांच्या बँक खात्यात मोठी रक्कम वर्ग करण्यास भाग पाडल्याची कबुली संशयितांनी दिली आहे. ६ ऑक्टोबर रोजी नाशिक शहरातील एका लोकप्रतिनिधीला भामट्यांनी धमकी दिली होती. प्रमोद मिश्रा नावाने फोन करून, आपण ‘पीएमओ’ कार्यालयातून बोलत असल्याचे सांगत, पक्षाच्या वरिष्ठ नेत्यांनी संबंधिताचे तिकीट कापल्याची बतावणी केली. लोकप्रतिनिधीचा विश्वास मिळवण्यासाठी भामट्यांनी आपल्या हातात त्याबाबतचे पत्र असल्याचे सांगत ते वाचूनही दाखवले.
आपले तिकीट वाचवायचे असल्यास उमेदवारी जाहीर होण्यापूर्वी ५० लाख रुपये द्यावे लागतील; तसेच मागणी पूर्ण न केल्यास राज्यात बदनामी करण्यात येईल, अशी थेट धमकी यावेळी भामट्यांनी दिली. अचानक बसलेल्या धक्क्यातून सावरलेल्या लोकप्रतिनिधीने जिल्ह्यातील आपल्या पक्षातील काही लोकप्रतिनिधींशी संपर्क साधल्याने भामट्यांचा हा डाव फसला. नाशिकसह अन्य ठिकाणच्या लोकप्रतिनिधींशी झालेल्या संपर्कातून पक्षाच्या नावाने कुणी तरी खंडणी उकळत असल्याचे पुढे आल्याने संबंधित लोकप्रतिनिधीने पोलिसांत धाव घेतली होती. याबाबत शहरातील सरकारवाडा पोलीस ठाण्यात गुन्हा दाखल करण्यात आला.
या घटनेची दखल घेत आयुक्त संदीप कर्णिक यांनी ठकबाजांच्या मुसक्या आवळण्याचे आदेश जारी केले होते. शहर गुन्हे शाखेच्या युनिट-१ चे सहाय्यक निरीक्षक हेमंत तोडकर यांना तांत्रिक विश्लेषणाद्वारे मिळालेल्या माहितीच्या आधारे पथकाने दिल्ली गाठून संशयितांच्या मुसक्या आवळल्या आहेत. संशयित नाशिक पोलिसांच्या जाळ्यात अडकताच दिल्ली पोलिसांच्या स्पेशल सेलने त्यांना ताब्यात घेतले होते.
