चाळीसगाव (प्रतिनिधी) तालुक्यातील पिलखोड येथे मद्यविक्री दुकानातच २३ वर्षीय तरुणाने चार दिवसांपूर्वी गळफास घेऊन आत्महत्या केली होती. यानंतर ग्रामस्थांनी गावात दारूला कायमची बंदी करण्याचा निर्धार केला असून शनिवारी बोलावलेल्या महिला ग्रामसभेत तब्बल ७०० महिलांनी दारू कायमची बंद करण्याचा निर्णय घेतला. सोमवारी राज्य उत्पादन शुल्क विभागाला पत्र दिल्यानंतर गावात दारूबंदी करण्याबाबत महिलांचे मतदान घेत निर्णय घेतला जाणार आहे.
देशी दारूच्या दुकानात काम करणाऱ्या कुणाल सोपान जाधव (वय २२) याने ३ रोजी याच दुकानात गळफास घेऊन आत्महत्या केली हाेती. या घटनेमुळे संतप्त ग्रामस्थांनी या तरुणाचा मृतदेह न हलवण्याचा पवित्रा घेतला हाेता. तसेच चाळीसगाव ते मालेगाव महामार्गावर ठिय्या देत रास्ताराेकाे करुन देशी दारू दुकान बंद करण्याची मागणी केली हाेती. घटनेचे गांभीर्य लक्षात घेऊन तहसीलदार अमोल मोरे व मेहुणबारे पोलिस ठाण्याचे सहाय्यक निरीक्षक विष्णू आव्हाड यांनी तत्काळ ते दुकान सील केले हाेते. तर संबंधित विभागाकडे अहवाल पाठवला हाेता. दरम्यान, गावात दारू नकाेच, असा ग्रामस्थांनी निर्धार केला.
त्यासाठी ग्रामपंचायतीनेही पुढाकार घेण्याचा मुद्दा आला. या पार्श्वभूमीवर ग्रामपंचायतीच्या सर्व १५ पदाधिकाऱ्यांनी गुरुवारी जळगावचे उत्पादन शुल्क विभागाच्या आयुक्तांची भेट घेत घटनेची माहिती दिली. त्यांच्या मार्गदर्शनात ग्रामपंचायतीने शुक्रवारी घराेघरी महिला ग्रामसभेचे अजेंडे वाटले, दवंडी देवून जागृती केली. त्यानुसार शनिवारी सकाळी ९ वाजता गावातील श्रीकृष्ण मंगल कार्यालयात महिला ग्रामसभा झाली. ग्रामसभेत सुमारे ७०० महिला व २०० पुरूष उपस्थित होते.
ग्रामसभेत महिलांनी संतप्त भावना व्यक्त केल्या. गावातील केवळ देशी दारू दुकानच नाही तर अवैधरित्या गावठी दारू व इतर सर्व अवैध धंदे बंद करण्याची महिलांनी एकमुखी मागणी केली. ग्रामसभेस सरपंच प्रकाश यशोद, उपसरपंच गोकुळ बाविस्कर, सदस्य सुरेश पाटील, भीमराव यशोद, गोरख बाविस्कर, संदीप मोरे, सुफियाबी पठाण, पुष्पाबाई पाटील, रत्नाबाई चौधरी, मंगलाबाई बाविस्कर, रूपाली पाटील आदी हजर हाेते. ग्रामसभेतील निर्णयानुसार पिलखोड येथील दारुबंदीचा ठराव जिल्हाधिकारी, जळगाव येथील राज्य उत्पादन शुल्क विभाग तसेच चाळीसगावचे उपविभागीय अधिकारी, तहसीलदार, मेहुणबारे पोलिस ठाण्याचे पोलिस अधिकाऱ्यांना सोमवारी देण्यात येणार आहे. त्यानंतर प्रशासनातर्फे गावात दारूबंदीबाबत मतदान घेतले जाईल. त्यात दारुची उभी बाटली व आडवी बाटली अशा दाेन प्रकारची निशाणी असेल. आडवी बाटली म्हणजे दारूबंदीच्या बाजूने मतदान असेल, अशी माहिती ग्रामविकास अधिकारी जे. आर. येवले यांनी िदली.
