जळगाव (प्रतिनिधी) स्वतःला डॉन म्हणवणाऱ्या तिघांनी चाय सुट्टा बार या हॉटेलात पिस्तूलचा धाक दाखवत धिंगाणा घातला होता. त्यानंतर पोलिसांनी अटक केलेल्या संदीप उर्फ डॉन मधुकर निकम व अंकुश सुरवाडे या दोघांना ओळखपरेडसाठी पुन्हा एकदा हॉटेलात नेले. यावेळी पोलिसांनी पोलिसी खाक्या दाखवत या गुन्हेगारी प्रवृत्तीच्या तरुणांचा हॉटेलातच माज उतरवला. दरम्यान, यावेळी एका अल्पवयीन मुलासही ताब्यात घेतले आहे.
हॉटेलचे व्यवस्थापक ओम हेमनानी यांनी दिलेल्या फिर्यादीवरून, दोघांच्या विरुद्ध रामानंदनगर पोलिस ठाण्यात गुन्हा दाखल करून दोघांना बुधवारी अटक केली. त्यानंतर दुपारी ४ वाजता पोलिस अधीक्षक डॉ. प्रवीण मुंढे, उपअधीक्षक कुमार चिंथा, पोलिस निरीक्षक विजय शिंदे यांनी ओळखपरेडसाठी दोघांना हॉटेलात नेले. या वेळी व्यवस्थापक हेमनानी यांनी ओळख पटवली. गुंडगिरीचा माज उतरवण्यासाठी या दोघांना डॉ. मुंढे यांनी हॉटेलातच पोलिसी खाक्या दाखवत माज उतरवला. त्यामुळे नागरिकांमध्ये समाधान व्यक्त केले जात आहे. दोघांना न्यायालयात हजर करून पोलिस कोठडी घेण्यात आली आहे. त्यांनी दहशत माजवण्यासाठी वापरलेले पिस्तूल कोठे लपवले आहे याची माहिती पोलिस घेत आहे.
