जळगाव (प्रतिनिधी) शहरातील एमआयडीसी परिसरातील हॉटेल तारा येथे सुरु असलेल्या देहविक्री रॅकेटचा पोलिसांनी पर्दाफाश केला. ही कारवाई बुधवारी रात्री अनैतिक मानवी वाहतूक प्रतिबंधक कक्षाच्या (एएचटीयू) पथकाने केली. याठिकाणाहून तीन बांग्लादेशी महिलांची सुटका करण्यात आली असून कुंटणखाना चालविणाऱ्यासह हॉटेल मालकासह पाच जणांना ताब्यात घेतले असून त्यांच्याविरुद्ध गुन्हा दाखल करण्यात आला आहे.
शहरातील एमआयडीसी परिसरातील एच सेक्टरमध्ये असलेल्या हॉटेल तारा येथे कुंटणखाना सुरु असल्याची माहिती पोलिसांना मिळाली होती. त्यानुसार संबंधित हॉटेलवर कारवाई करण्याचे आदेश पोलीस अधीक्षक डॉ. महेश्वर रेड्डी यांनी दिले होते. त्यानुसार अपर पोलीस अधीक्षक अशोक नखाते, पोलीस उपअधीक्षक संदीप गावित यांच्या मार्गदर्शनाखाली अनैतिक मानवी वाहतुक प्रतिबंध कक्षाचे (एएचटीयू) विभागातील सपोनि योगिता नारखेडे, उपनिरीक्षक दिनेश बडगुजर, सफौ संजय हिवरकर, विठ्ठल फुसे, रविंद्र गायकवाड, अनिल पाटील, जितेंद्र पाटील, निलीमा सुशीर, मनिषा पाटील, वाहिदा तडवी, अर्चना भावसार यांचे पथक तयार करुन कारवाईसाठी रवाना केले.
सिग्नल मिळताच टाकला छापा
पथकाने माहितीच्या आधारावरुन संबंधित हॉटेलमध्ये बनावट ग्राहक पाठवला ग्राहकाला संबंधित हॉटेलमध्ये कुंटणखाना सुरु असल्याची खात्री झाल्यानंतर बनावट ग्राहकाने पथकाला सिग्नल दिला. त्यानुसार सापळा रचून बसलेल्या पथकाने हॉटेलवर छापा टाकला. याठिकाणाहून तीन महिलांसह हॉटेल मालक योगेश दीपक देवरे (वय २३, रा. सुप्रिम कॉलनी), राज सुरेश तायडे (वय २०, रा. तारा हॉटेल) व मंगेश सुधाकर सोमवंशी (वय १८, रा. रामेश्वर कॉलनी) यांच्याविरुद्ध एमआयडीसी पोलिसात गुन्हा दाखल करण्यात आला आहे.
नोकरीचे अमिष दाखवून आणले जाते भारतात
शहरात बांगलादेशी महिलांकडून वेश्याव्यवसाय करून घेतल्याच्या अनेक घटना यापूर्वी उघडकीस आल्या आहेत. बांगलादेशी महिलांना जास्तीच्या पैशांचं किंवा नोकरीचं आमिष दाखवून भारतात आणले जाते. त्यानंतर त्यांच्याकडून जबरदस्तीने वेश्या व्यवसाय करवून घेत असल्याचे आतापर्यंत झालेल्या कारवायांमध्ये उघडकीस आले आहे. त्यामुळे या प्रकरणाची पोलिसांकडून कसून चौकशी केली जात आहे.
