मुंबई (वृत्तसंस्था) राज्यात जिल्हा बॅंकांच्या निवडणुका पार पडल्या. आता पुन्हा चार महानगरपालिकांच्या रिक्तपदांसाठी पोटनिवडणुकांचे बिगुल वाजले आहे. यात धुळे, अहमदनगर, नांदेड- वाघाळा आणि सांगली-मिरज-कुपवाडया या चार ठिकाणी या निवडणुका पार पडतील.
या चार महानगरपालिकांमधील रिक्तपदांच्या पोटनिवडणुकांसाठी पुढील महिन्यात २१ डिसेंबर २०२१ रोजी मतदान प्रक्रिया पार पडणार आहे. तर २२ डिसेंबर २०२१ रोजी मतमोजणी होणार आहे, अशी माहिती राज्य निवडणूक आयुक्त यू. पी. एस. मदान यांनी येथे दिली. या पोटनिवडणुकांच्या पार्श्वभुमीवर संबंधित प्रभागात आजपासून आचारसंहिता लागू करण्यात आली आहे. निवडणुकीचा निकाल जाहीर होईपर्यंत ही आचारसंहिता अंमलात राहणार असल्याचंही आयुक्त मदान यांनी सांगितलं आहे.
२९ नोव्हेंबर ते ६ डिसेंबर २०२१ या कालावधीत नामनिर्देशनपत्रे स्वीकारले जातील. तर ५ डिसेंबरला शासकीय सुट्टीमुळे नामनिर्देशनपत्रे स्वीकारली जाणार नाहीत. ७ डिसेंबर २०२१ रोजी नामनिर्देशनपत्रांची छाननी होईल. ९ डिसेंबर २०२१ पर्यंत नामनिर्देशनपत्रे मागे घेण्याची अंतिम मुदत असेल. निवडणूक लढविणाऱ्या उमेदवारांना १० डिसेंबर २०२१ रोजी निवडणूक चिन्हे नेमून दिली जातील. २१ डिसेंबर २०२१ रोजी सकाळी ७.३० ते सायंकाळी ५.३० या वेळेत मतदान होईल. मतमोजणी २२ डिसेंबर २०२१ रोजी होईल.
पोटनिवडणूक होत असलेली महानगरपालिकानिहाय रिक्तपदे : धुळे- 5ब, अहमदनगर- 9क, नांदेड वाघाळा- 13अ आणि सांगली मिरज कुपवाड- 16अ,
दरम्यान, राज्य निवडणूक आयोगाच्या ट्रू-व्होटर मोबाईल ॲपद्वारेदेखील आता विधानसभा मतदारसंघाच्या मतदार यादीत नाव नोंदविता येणार असल्याची माहिती मदान यांनी दिली. स्थानिक स्वराज्य संस्थांच्या निवडणुकांबाबत उमेदवार, मतदार, राजकीय पक्ष आणि निवडणूक यंत्रणेला माहिती उपलब्ध करून देण्यासाठी ट्रू-व्होटर मोबाईल ॲप विकसित करण्यात आले आहे. या ॲपच्या माध्यमातून मतदारांना मतदार यादीतील आपले नाव शोधता येते. याचबरोबर या ॲपमध्ये आता मतदार नोंदणीही करता येणार आहे.
