जळगाव/फैजपूर (प्रतिनिधी) प्री वेडिंग शुटवर बंदी घालण्याचा निर्णय जिल्ह्यातील गुजर आणि सकल लेवा पाटीदार समाजाने घेतला आहे. दोन्ही समाजाच्या बैठकीत हे निर्णय घेण्यात आले आहेत.
मोठे वाघोदा येथे गुजर समाज बांधवांच्या विविध ठराव मंजूर !
मोठे वाघोदा येथे श्रीकृष्ण मंदिर आश्रमात गावातील गुजर समाज बांधवांची सभा नुकतीच पार पडली. या सभेत समाजात लग्नकार्यामध्ये असलेल्या अनिष्ट चालीरीतींवर सविस्तर चर्चा करून त्या बंद करण्याबाबत निर्णय सर्वानुमते घेण्यात आला. या निर्णयाची तत्काळ अंमलबजावणी करण्यात येणार आहे. काही दिवसांत लग्नाचे मुहूर्त त्यांच्यासाठी हे नियम आणि अटी आजपासूनच लागू झाल्याचे जाहीर करण्यात आले. सभेचे वैशिष्ट्य म्हणजे गावपातळीवर सर्वसंमतीने पारित झालेल्या ठरावांचे पालन न करणाऱ्या परिवाराला त्यांच्या घरी आयोजित लग्नकार्यास गावातील समाजबांधवांचे कोणत्याही प्रकारचे सहकार्य न करण्याचे एकमताने मंजूर करण्यात आले.
सभेतील ठराव
प्री-वेडिंग व फोटोशूट बंद. तृतीयपंथी नाचवण्यास बंदी. -मेहंदी कार्यक्रमावर पूर्णपणे बंदी, हळदी असलेल्या दिवशी जेवणाच्या कार्यक्रमावर बंधने घालण्यात आली. – गावात लग्न लागून आल्यावर वधू- वराच्या स्वागत मिरवणुकीवर बंदी घालण्यात आली.
लेवापाटीदार समाजाचाही ‘प्री वेडींग शुटींग विरोधात ठराव मंजूर
लेवापाटीदार समाजाची रविवारी सरदार पटेल लेवा भवनात समाजातील विविध क्षेत्रात कार्य केलेल्या ३० समाजबांधवांचा सत्कार करण्यात आला. या वेळी ‘प्री वेडींग शुटींग विरोधात ठराव मंजूर करीत यावर बंदी घालण्यात आली. तसेच या संदर्भात सामुदायिक शपथ घेण्यात आली. ‘लेवा भातृ मंडळाने या विरोधात कृती आराखडा सादर केला. त्यानुसार अंमलबजावणी करण्याचे ठरवण्यात आले.
प्रा. व. पू. होले यांनी ‘समाजातील वाढत्या घटस्फोटाच प्रमाण अन् समाज मंडळांची भूमिका’, ‘प्री वेडिंग शुटींग’ यावर प्रकाश टाकला. अरुण बोरोले यांनी ‘प्री वेडिंग शूट’ विरोधात ठराव मांडला. डॉ. प्रमोद महाजन यांनी घटस्फोटाची समस्या हाताळण्यासाठी समाज मंडळांनी काय करावे याविषयी माहिती दिली. या वेळी कुटूंबनायक रमेश पाटील, माजी नगराध्यक्ष पाडुरंग काळे, अॅड. प्रकाश पाटील उपस्थित होते. समाजमंडळातर्फे या कार्यक्रमाचे आयोजन करण्यात आले होते विविध क्षेत्रात कार्य केलेल्या ३० समाज बांधवांचा सत्कार देखील करण्यात आला.
