रावेर (प्रतिनिधी) रावेर ते वाघोदा रस्त्यावर अज्ञात वाहनाच्या धडकेत वाघोदा बुद्रुक (ता. रावेर) येथील रहिवासी ३२ तरुणाचा जागीच मृत्यू झाला. ही घटना रविवारी रात्री ८ वाजेच्या सुमारास घडली. युनूस इतबार तडवी असे मृताचे नाव आहे.
युनूस तडवी हा आई, पत्नी व दोन मुलांसह रावेर तालुक्यातील वाघोदा बुद्रुक येथे वास्तव्याला आहे. शेतात केळी मजुरीचे काम करून तो उदरनिर्वाह करत होता. रविवारी (दि.२३) सायंकाळी ६ वाजता युनूस हा दुचाकीने (एमएच. १९ – बीबी. ०३९५ ) सासरी वडगाव येथे गेला होतो. तेथून परत येत असताना वाघोदा ते रावेर रस्त्यावर एका शेताजवळ अज्ञात वाहनाने त्याच्या दुचाकीला जोरदार धडक दिली. त्यात गंभीर जखमी होऊन युनूसचा जागीच मृत्यू झाला. ही माहिती मिळताच युनूसचे काका हमीद हसन तडवी यांनी घटनास्थळ गाठले. पुतण्याचा मृतदेह पाहून त्यांनी हंबरडा फोडला. नंतर मृतदेह रावेर ग्रामीण रुग्णालयात नेण्यात आला. हमीद तडवी यांच्या फिर्यादीवरून सावदा पोलिस ठाण्यात अज्ञात वाहन चालकावर गुन्हा दाखल झाला.
