मुंबई (वृत्तसंस्था) दिवाळखोरीत निघालेल्या दीवान हाउसिंग फायनान्स लिमिटेडचे (DHFL) प्रमोटर्स कपिल आणि धीरज वाधवानसंबंधीत असलेल्या मनी लॉन्ड्रिंग प्रकरणात माजी केंद्रीय मंत्री आणि महाराष्ट्राचे माजी मुख्यमंत्री सुशील कुमार शिंदे यांची मुलगी प्रीती राज श्रॉफ आणि जावई राज श्रॉफ यांची कमर्शियल संपत्ती ईडीने जप्त केली आहे. जप्त केलेली संपत्ती अंधेरी पूर्व येथील कालेडोनिया बिल्डिंग येथे आहे.
ईडीने म्हटलं की, मनी लॉन्ड्रिंग कायद्यांर्तग (पीएमएलए) कारवाई केलेल्या मालमत्तांमध्ये अंधेरी (पूर्व), मुंबई येथील कॅलेडोनिया बिल्डिंगमधील १०,५५० चौरस फूट दोन व्यावसायिक मालमत्तांचा समावेश आहे. ३५.४८ कोटींची मालमत्ता राज श्रॉफ आणि त्यांची पत्नी प्रीती श्रॉफ यांच्या मालकीची आहे. प्रीती श्रॉफ कॉंग्रेस नेते सुशील कुमार शिंदे यांची मुलगी आहे.
अनेक घोटाळ्यांमध्ये सामिल डीएचएफएल
पंजाब नॅशनल बँकेने (पीएनबी) दीवाण हाउसिंग फायनान्स लिमिटेडला दिलेलं ३,६८८.५८ कोटी कर्जाला घोटाळा घोषित केलं आहे. येस बँकेतील घोटाळ्याबाबतही या कंपनीची चौकशी सुरु आहे. कंपनीचे प्रमोटर वाधवान बंधू अटकेत आहेत आणि त्यांची मालमत्ता देखील ईडीने जप्त केली आहे. येस बँक कर्ज घोटाळ्याप्रकरणी ईडीने माजी बँक प्रमुख राणा कपूर आणि डीएचएफएलचे प्रमोटर कपिल वाधवान आणि धीरज वाधवान यांच्याकडे २४०० कोटी रुपयांची संपत्ती अटॅच केली आहे. यात राणा कपूरचे १००० कोटी आणि वाधवान बंधूंच्या १४०० कोटी रुपयांच्या मालमत्तेचा समावेश आहे.
भारतीय रिझर्व्ह बँकेने DHFL प्रकरण नॅशनल कंपनी लॉ ट्रायब्यूनलकडे (NCLT) सोपवलं होतं. DHFL अशी पहिली वित्तीय कंपनी आहे, जी RBI ने कलम २२७ अंतर्गत विशेष अधिकारांचा वापर करत NCLT मध्ये पाठवली होती. यापूर्वी कंपनी बोर्डाला बरखास्त करण्यात आलं होतं.
