नवी दिल्ली (वृत्तसंस्था) पंजाबी गायक सिद्धू मुसेवाला यांच्या हत्या प्रकरणाचं पुणे कनेक्शन आता समोर आलं आहे. सिद्धू यांच्या हत्या प्रकरणातील दोन आरोपी पुण्याचे असल्याची माहिती हाती आली आहे. मुसेवालांवर हल्ला करण्यासाठी आठ शार्प शूटर नेमकण्यात आले होते. त्यापैकी दोघे पुण्याचे असून त्यांना पोलिसांनी ताब्यात घेतलंय.
पंजाब पोलिसांच्या तपासामध्ये पुण्यातील सौरभ महाकाळ आणि संतोष जाधव या दोघांची नावं समोर आल्यानंतर त्यांना पंजाब पोलिसांनी पुण्यामधून ताब्यात घेतल्याची माहिती सुत्रांनी दिलीय. मुसेवालांच्या हत्येसाठी एकूण आठ जणांना सुपारी देण्यात आलेली. यापैकी तिघे पंजाबमधील होते. तर अन्य पाच जणांना महाराष्ट्र आणि राजस्थानमधून बोलवण्यात आलेलं. यामध्ये पुण्यातील दोघांचा समावेश आहे. या दोघांनाही पंजाब पोलिसांनी पुण्यातून आज सकाळच्या सुमारास अटक केलीय.
पोलिसांनी यापूर्वीच दिलेल्या माहितीनुसार या हत्येसाठी एएन-९४ ही रशियन बनावटीची असॉल्ट रायफल वापरण्यात आली. अशाप्रकारे पंजाबमधील गँगवॉरदरम्यान एएन-९४ रायफल वापरण्याची ही पहिलीच वेळ आहे. सिद्धू मुसेवाला यांच्यावर २ मिनिटांमध्ये ३० गोळ्या झाडण्यात आल्या. समोर आलेल्या माहितीनुसार मुसेवाला यांच्या गावात हल्लेखोर पोहचले तेव्हा मुसेवालांच्या सुरक्षेसाठी तैनात असणारे एके-४७ बंदुका घेऊन असलेले कमांडो पाहून परतले. त्यानंतर त्यांनी कॅनडामधील गँगस्टर सतींदर सिंग उर्फ गोल्डी ब्रारकडून एएन-९४ रायफल मागवली. याच रायफलने मुसेवालांची हत्या करण्यात आली.
