कासोदा, ता. एरंडोल (प्रतिनिधी) आजारी आईची प्रकृती बिघडल्याने त्यांना पाहण्यासाठी कासोदा येथे ३ दिवस राहिल्यानंतर घरी परत जाताना वरखेड ते भडगाव रस्त्यावरील पुलाखाली दुचाकीसह पडून झालेल्या अपघातात एकाचा मृत्यू झाल्याची दुर्दैवी घटना नुकतीच घडली आहे.
कासोदा येथील मूळ रहिवासी व सध्या घनसोली (नवी मुंबई) येथे २० वर्षांपासून रिक्षा चालवणारे सुरेश नथू पाटील (वय ४६) हे गेल्या तीन दिवसापासून आई आजारी असल्यामुळे त्यांना पाहण्यासाठी गावी आले आले होते. आईची भेट घेऊन रविवारी रात्री ८ वाजेच्या सुमारास कासोदा येथून स्कुटीने पाचोरा येथे जात असताना वरखेडच्या पुढे आडगाव रोडवर असलेल्या रुबल हॉटेल पुढील पुलावरून स्कुटीसह ते सुमारे २५ फूट खोल खाईत पडले.
रात्रीची वेळ असल्यामुळे अपघात झाल्याचा प्रकार कोणाच्याही लक्षात आला नाही. त्यामुळे सुरेश पाटील हे जखमी अवस्थेत रात्रभर पडून होते. दरम्यान, सुरेश पाटील यांनी घनसोली येथील त्यांच्या पत्नीला रात्री निघण्यापूर्वी घरी येत असल्याचा निरोप दिला होता. त्यामुळे सकाळी ते घरी परत येतील अशी वाट पाहणाऱ्या त्यांच्या पत्नीने पतीला मोबाईलद्वारे संपर्क साधण्याचा प्रयत्न केला. त्यांच्या मोबाईलची रिंग वाजत होती, परंतु मोबाईल कुणी उचलत नव्हता. त्यामुळे त्यांच्या पत्नीने गावी असलेल्या त्यांच्या पुतण्याला ही हकीकत सांगितली. त्यांनीही मोबाईल लावून पाहिला पण मोबाईल कुणी उचलत नव्हते. त्यामुळे त्यांनी कासोदा पोलीस स्टेशनला मिसिंगची नोंद करण्यात आली.
याचदरम्यान, सायंकाळी ५ वाजता वरखेड ते जळगाव रस्त्यावरुन जाणाऱ्या एका शेतकऱ्याच्या ही घटना निदर्शनास आली. आजूबाजूच्या शेतकऱ्यांच्या मदतीने त्यांना बाहेर काढले. या वेळी कासोदा येथून जाणऱ्या व्यक्तीने त्यांचा मृतदेह ओळखून ही माहिती कासोदा पोलीस ठाण्यात दिली. दरम्यान, ५ सप्टेंबर रोजी त्यांची कासोदा येथील त्यांच्या राहत्या घरापासून सकाळी ९ वाजता अंत्ययात्रा निघणार आहे. या दुःखद घटनेमुळे कासोदा गावात शोककळा पसरली आहे.
