भंडारा (वृत्तसंस्था) तुमसर वरून – रामटेक मार्गे जाणारी कार अनियंत्रित होऊन रस्त्याच्या कडेला उलटली. यामुळे एकाचा जागीच मृत्यू तर एक गंभीर जखमी झाल्याची घटना गुरुवारी (७ सप्टेंबर) सकाळी ११ वाजता तुमसर राष्ट्रीय महामार्गावरील खापा काटेबाम्हणी शेत शिवारात घडली. ब्रह्मा तेजराम रहांगडाले (५०, मनसर) असे मृताचे नाव तर निखिल नखाते (मांजरी, मनसर) असे जखमी झालेल्या इसमाचे नाव आहे.
राष्ट्रीय महामार्ग रामटेक गोंदिया मार्गावर खापा काटेबाम्हणी शेत शिवारात तुमसरवरून रामटेककडे भरगाव वेगाने जात असलेली कार (एमएच ३१, डीके ५७८३) रस्त्याच्या कडेला उलटली. या वाहनात दोन व्यक्ती होते. कारचालक ब्रह्मा रहांगडाले आणि जखमी निखील नखाते यांना गावकऱ्यांच्या साहाय्याने जखमी अवस्थेत रुग्णालयात नेत असताना वाटेतच ब्रह्मा यांचा मृत्यू झाला. ते गोकुळाष्टमी निमित्त स्वगावी मिटेवाणी येथे आले होते.
पुढील तपास तुमसर पोलीस स्टेशनचे ठाणेदार निलेश ब्राह्मणे यांच्या मार्गदर्शनाखाली पोलीस उपनिरीक्षक निवृत्ती गीते व पोलीस उपनिरीक्षक विजय सिंग गोमलाडू करीत आहेत.
व्यवसायाने डॉक्टर असलेले ब्रह्मा राहांगडले यांच्या अवकाळी मृत्यू झाल्याने गावात शोककळा पसरली आहे. आज कान्होबाचे विसर्जन असतानाच ही दुःखद घटना घडल्यामुळे वाणी गावामध्ये दुःखद वातावरण आहे.
