जळगाव (प्रतिनिधी) – रस्त्याच्या कामाचे बिलाचे पैसे अदा करण्याच्या मोबदल्यात बस कॉन्ट्रॅक्टरकडून वरिष्ठ अधिकाऱ्यांसह स्वतःसाठी १५ लाख रुपयांची लाच मागितली. त्या लाचेचा पहिला हप्ता ५ लाख रुपये घेतांना सार्वजनिक बांधकाम विभागातील शाखा अभियंता योगेश अभिमन्यू अहिरे (वय ४४) यांना लाचलुचपत प्रतिबंधक विभागाने रंगेहाथ पकडले. लाचेची रक्कम ही त्यांच्या कारच्या समोरील सीटवर ठेवण्यास सांगत लाच स्विकारली. ही कारवाई शनिवारी दुपारच्या सुमारास झाली आहे.
तक्रारदार हे सब कॉन्ट्रक्टर असून त्यांना शहरातील वार्ड क्रमांक १४ मधील विनोबानगरातील सिमेंट काँक्रीटच्या रस्त्याचे ८० लाख ३९ हजार ७४२ रुपयांचे काम २०२४ मध्ये मंजूर झाले आहे. सन २०२५ मध्ये हे काम मुदतीत पुर्ण केल्यानंतर निधी उपलब्ध नसल्याने सार्वजनिक बांधकाम विभाग यांच्याकडून कामाच्या पैशांपैकी तक्रारदार यांना अंदाजे ५८ लाख रुपयांचे बिल मंजूर होवून ऑक्टोंबर २०२५ मध्ये प्राप्त झाले होते. तर उर्वरीत ३८ लाख ४९ हजार ७४२ रुपये अद्यापपर्यंत अप्राप्त होते. तक्रादार हे बिलाची विचारपूस करण्यासाठी सार्वजनिक बांधकाम विभागातील शाखा अभियंता योगेश अहिरे यांना भेटले. त्यांनी तक्रादार यांच्याकडे यापुर्व अदा केलेल्या बिलाचे काम करुन दिल्याच्या मोबदल्यात आणि उर्वरीत बिल मंजूर करुन देण्याकरीता १८ लाख रुपयांच्या लाचेची मागणी केली होती.
नगरसेविकेच्या मुलाला देण्यास सांगितली ६ टक्के रक्कम
लाचेच्या रकमेव्यतरीक्त एकूण बिलाच्या ६ टक्के प्रमाणे बिलाची रक्कम ही नगरसेविकेच्या मुलास देण्यास तक्रारदार यांना शाखा अभियंता योगेश अहिरे यांनी लाच मागणीस प्रोत्साहन दिले. त्यामुळे वार्ड क्रमांक १४ मधील नगरसेविकेचा मुलगा देखील चौकशीच्या रडारवर आला आहे.
सुटीच्या दिवशी स्विकारली लाच
लाचखोर शाखा अभियंता योगेश अहिरे याने स्वतः सह त्याच्या वरिष्ठ अधिकाऱ्यासाठी पाच लाखांची लाच स्विकारल्याचे तपासात उघड झाले आहे. शासकीय कार्यालयांना सुट्टी असतांना देखील लाचखोर अहिरे याने कार्यालयाच्या परिसरात लाच स्विकारली. ज्यांच्या नावाने लाच स्विकारली ते वरिष्ठ अधिकारी देखील आता चौकशीच्या रडावर आले आहे.
