जळगाव (प्रतिनिधी) सहकार विभागाच्या तीन पथकांनी आज जळगाव व कासोदा (ता.एरंडोल) येथे सकाळी ११ ते १२ वाजेदरम्यान अवैधरित्या सावकारी करणाऱ्या तीन जणांच्या घरी व दुकानांवर छापे टाकून कारवाई केली आहे. अवैधरित्या सावकारी बाबत अनेक महत्वाची कागदपत्रे ताब्यात घेण्यात आली आहेत. ही कारवाई पोलीस बंदोबस्तात करण्यात आली.
जिल्ह्यात सुरू असलेल्या अवैध सावकारी विरोधात अनेक तक्रारी सहकार जिल्हा विभागाकडे प्राप्त झाल्यानंतर जिल्हा उपनिबंधक संतोष बिडवई यांनी तीन पथके नियुक्त केली. त्यात सहकार विभागाचे सहाय्यक निबंधक व छापा पथकप्रमुख के.पी.पाटील (एरंडोल), जी.एच. पाटील (अमळनेर) आणि विलास गावडे (जळगाव) यांच्या नेतृत्वाखाली ही पथके नियुक्त करण्यात आली. जळगाव व कासोदा येथे तीन जण अवैधरित्या सावकारी करणाऱ्यांच्या दुकानाची व घराची तपासणीसाठी सकाळी ११ ते १२ वाजेदरम्यान छापे टाकण्यात आले. त्यात सपना शैलेश बियाणी, शैलेश श्रीराम बियाणी, श्रीराम गणपत बियाणी यांच्या जळगाव व कासोदा येथील दुकाने व घरांवर छापे टाकले. त्यात ते अवैधरित्या सावकारी करताना आढळून आले. यावेळी त्यांच्याकडून सावकारी व्यवहाराची अनेक कागदपत्रे, फाईल जप्त करण्यात आल्या. न. जळगाव येथील छाप्यात विलास गावडे यांच्या नेतृत्वाखाली आय.बी. तडवी, चेतन राणे, नीलेश घाटोळ, संगीता गायकवाड यांचा सहभाग होता. यामुळे अवैधरित्या सावकारी करणाऱ्यांमध्ये एकच खळबळ उडाली आहे.
