जळगाव (प्रतिनिधी) शहरात कोरोना रुग्णांची संख्या दिवसेंदिवस वाढत असून संसर्ग अधिक पसरत आहे. कोरोना संशयितांची मनपाकडून आरटीपीसीआर चाचणी केली जात असून त्याचे तपासणी स्वब शासकीय वैद्यकीय महाविद्यालय व रुग्णालयात पाठविण्यात येत आहे. वैद्यकीय महाविद्यालयातील यंत्रणा कमी पडत असल्याने अहवाल उशिरा येत आहे. अहवाल लवकरात लवकर मिळावे यासाठी संबंधित यंत्रणेला सूचना देऊन कार्यवाही करावी, अशी विनंती महापौर सौ.भारती सोनवणे यांनी पालकमंत्री ना.गुलाबराव पाटील यांच्याकडे केली आहे.
जळगाव शहरात गेल्या १५ दिवसापासून कोरोनाचा संसर्ग वाढू लागला असून रुग्णांची संख्या दररोज वाढत आहे. जळगाव शहर मनपाकडून रुग्णांची कोरोना चाचणी करण्याची व्यवस्था शासकीय अभियांत्रिकी महाविद्यालयात करण्यात आलेली आहे. जळगाव मनपाकडून दररोज सरासरी २०० संशयितांचे आरटीपीसीआर स्वब आपल्याकडे पाठविण्यात येत आहे. दररोज सरासरी केवळ ६० लोकांचे अहवाल मनपाला प्राप्त होतात. रुग्णांचे अहवाल ५-५ दिवस उशिरा येत असल्याने संशयित रुग्ण परिवारात आणि बाहेर इतरांमध्ये मिसळत असल्याने कोरोनाचा संसर्ग अधिक वाढतो. कोरोना आरटीपीसीआर चाचणीचे अहवाल लवकरात लवकर मिळावे यासाठी संबंधित विभागाला योग्य त्या सूचना देत यंत्रणा अधिक सक्षम करावी, अशी विनंती महापौर सौ.भारती सोनवणे यांनी पालकमंत्री ना.गुलाबराव पाटील यांच्याकडे केली आहे. तसेच निवेदनाची प्रत जिल्हाधिकारी व शासकीय वैद्यकीय महाविद्यालयाचे जिल्हा
मुख्य अधिष्ठाता यांना पाठविण्यात आलेली आहे.
