जळगाव (प्रतिनिधी) शेतजमीन अकृषिक जमिनीमध्ये रूपांतरित करण्याकरिता शासकीय फी व्यतिरिक्त 1 लाख 42 हजार रूपयांच्या लाचेची स्वतःकरिता व इतर लोकसेवकांकरिता मागणी करून ती रक्कम घेताना नायब तहसीलदाराला ठाणे अॅन्टी करप्शनच्या पथकाने आज रंगेहाथ पकडले होते. याच संदर्भात आज जळगाव एसीबीच्या पथकाने संशयित आरोपी नायब तहसीलदाराच्या गावी अर्थात धरणगाव येथे झाडाझडती केल्याचे वृत्त समोर येत आहे.
याबाबत अधिक माहिती अशी की, तक्रारदार यांच्या परिचयाच्या व्यक्तीची शेतजमीन अकृषिक करावयाची होती. त्यासाठी निवासी नायब तहसीलदार वासुदेव पवार (वय 57, निवासी नायब तहसीलदार, तहसीलदार कार्यालय, ठाणे) यांनी शासकीय फी व्यतिरिक्त 1 लाख 42 हजार रूपयाच्या लाचेची मागणी केली. लाच देण्याची इच्छा नसल्याने तक्रारदाराने अॅन्टी करप्शन विभागाकडे तक्रार दिली. प्राप्त तक्रारीची पडताळणी करण्यात आली. त्यानुसार सोमवारी दुपारी साडेचार वाजण्याच्या सुमारास सरकारी पंचासमक्ष निवासी नायब तहसीलदार वासुदेव पवार यांनी तक्रारदाराकडून 1 लाख 42 हजार रूपयाची लाच घेतली. त्यांना रंगेहाथ पकडण्यात आले. त्यानंतर त्यांच्याविरूध्द गुन्हा दाखल करण्यात आला. दरम्यान, संशयित आरोपी धरणगाव येथील रहिवाशी असल्यामुळे त्यांच्या गावातील घराची झाडाझडती जळगाव एसीबीच्या पथकाने घेतल्याचे कळते. या वृत्ताला स्थानिक पोलीस सूत्रांनी दुजोरा दिला आहे. मात्र, धरणगावच्या झाडाझडती पथकाला नेमकं काय सापडलं? याबाबत अधिकृत काहीही माहिती मिळू शकली नाही, तसेच वृत्ताला अधिकृत दुजोरा देण्यास कुणीही समोर आले नाही.
