जळगाव (प्रतिनिधी) वराड ते जळके रोडवर एका व्यक्तीला चाकू सारख्या हत्याराचा धाक दाखवून रोख रक्कमेसह, सॅमसंग कंपनीचा टॅब ऑफिसचे कर्ज वाटप फॉर्म व कलेक्शन शीट, असा एकूण १ लाख २२ हजार १५८ रुपयांचा मुद्देमाल लुटून नेल्याची घटना उघडकीस आली आहे. याप्रकरणी एमआयडीसी पोलीस ठाण्यात तीन अज्ञात इसमांविरुद्ध गुन्हा दाखल करण्यात आला आहे.
यासंदर्भात ज्ञानेश्वर धोंडु सपकाळे (वय ३३, रा. हिवरखेडा रोड सुयोग कॉलनी ता. जामनेर) यांनी दिलेल्या फिर्यादीनुसार, दि. १७ मे २०२२ रोजी दुपारी ३ ते ३.१५ वाजेच्या सुमारास तीन अज्ञात इसम हे लाल रंगाच्या मोटर सायकलवर येऊन ज्ञानेश्वर सपकाळे यांच्या मोटरसायकलच्या समोर मोटार सायकल आडवी लावली. त्यातील एकाने ज्ञानेश्वर यांची मोटारसायकल रस्त्याच्या बाजूला खाली ढकलून दिली. तर इतर दोघांनी त्यांच्या हातातील चाकू सारखे हत्याराचा धाक दाखवला. एवढेच नव्हे तर, त्यातील एकाने चाकू सारख्या हत्याराने ज्ञानेश्वर यांच्या तळहातावर मारून दुखापत केली. यावेळी ज्ञानेश्वर यांच्या जवळ असलेली काळया रंगाची सॅग बॅग व त्यामधील १ लाख ७ हजार १५८ रोख रक्कम, १५ हजार रुपये किंमतीचा सॅमसंग कंपनीचा टॅब, ऑफिसचे कर्ज वाटप फॉर्म व कलेक्शन शीट, असा एकूण १ लाख २२ हजार १५८ रुपयांचा मुद्देमाल बळजबरीने हिसकावून चोरून नेला. याप्रकरणी एमआयडीसी पोलीस स्थानकात तीन अज्ञात चोरट्यांविरुद्ध गुन्हा दाखल करण्यात आला असून पुढील तपास सपोनि अमोल मोरे हे करीत आहेत.
