अहमदनगर (वृत्तसंस्था) दारू प्यायला पैसे देत नाहीत. लहान भावाला मात्र पैसे देता, याचा राग आल्याने वडिलांसमोरच बाबाजी विष्णू फुंदे (वय ३५) याने लहान भाऊ निलेश विष्णू फुंदे हा झोपेत असताना त्याच्या डोक्यात कुऱ्हाडीने घाव घालू खून केल्याची खळबळजनक घटना जिल्ह्यातील पाथर्डी येथे घडली आहे.
बाबाजी विष्णू फुंदे याला दारूचे व्यसन असून लहान भाऊ निलेश व वडील विष्णू फुंदे हे त्याला वेळोवेळी समजावून सांगत होते. तू दारू पिऊ नको, अशी समज देत होते. त्याचा राग बाबाजीच्या डोक्यात होता. सोमवारी सकाळी सहा वाजता बाबाजीने वडील विष्णू व आई चंद्रकला यांच्याकडे दारू पिण्यासाठी पैसे मागितले. आम्ही तुला पैसे देणार नाहीत, असे वडिलांनी सांगितले. त्यानंतर तुम्ही मला पैसे देत नाहीत व निलेशला पैसे देता, असे म्हणत मी निलेशलाच संपवितो, अशी दमबाजी बाबाजीने वडिलांना केली. त्यानंतर लगेच घरात झोपलेल्या निलेशच्या डोक्यात कऱ्हाडीने घाव घातले. निलेश झोपेतच बेशुद्ध झाला.
वडील विष्णू फुंदे यांनी आरडाओरड केल्यानंतर शेजारी धावले. मात्र, डोक्यात जबर मार लागल्याने रक्तस्राव झाला. निलेश फुंदेवर कुऱ्हाडीचे वार करून बाबाजी घरातून पळून गेला. तो पाथर्डीत आल्याची माहिती पोलिसांना मिळाली होती. शेवगाव रस्त्याने रस्त्याने शहरातून बाबाजी पळत असताना सहाय्यक पोलिस निरीक्षक योगेश राजगुरू, उपनिरीक्षक श्रीकांत डांगे, निलेश म्हस्के, किरण बड़े यांनी बाबाजीचा पाठलाग करून त्याला ताब्यात घेतले. विष्णू काशीनाथ फुंदे रा. खिळावस्ती, फुंदेटाकळी यांच्या फिर्यादीवरून बाबाजी विष्णु फुंदे याच्याविरुद्ध खुनाचा गुन्हा दाखल करण्यात आला आहे.
