अहमदनगर (वृत्तसंस्था) घरात किराणा सामान आणण्यासाठी पतीने पैसे दिले नाहीत म्हणून पत्नीने पतीच्या तोंडात मारली. याचा राग आल्याने दिराने रागाच्या भरात भावजईच्या डोक्यात लाकडी ढलपी घालून खून केला. सीमा बाळू घोडेस्वार ( वय ३५), रा. साकतता. जामखेड), असे खून झालेल्या महिलेचे नाव आहे.
मयत सीमा हिचे १५ वर्षांपूर्वी बाळू अरुण घोडेस्वार याच्या सोबत लग्न झाले होते. ती सासरी साकत, या ठिकाणी नांदत होती. त्यांना दीक्षा नावाची १३ वर्षांची मुलगी आहे. सीमा सासरी नांदत असताना पती व दीर पैशांसाठी तिचा वारंवार छळ करून मानसिक त्रास देत होते. रविवार, दि. ८ ऑक्टोबर २०२३ रोजी सायंकाळी साडेसात वाजण्याच्या सुमारास मयत सीमा हिचा पती गावातील एका शाळेत दारू पिऊन बसला होता. घरातील किराणा सामान संपल्याने सीमा व मुलगी पैसे मागण्यासाठी पतीकडे गेले. मात्र, पतीने पैसे देण्यास नकार देताच मयत सीमा हिने पतीच्या तोंडात एक झापड मारली. या वेळी मयत सीमा हिचा दीरदेखील त्या ठिकाणी होता, त्याने आपल्या भावाच्या तोंडात भावजईने झापड मारलेली पाहिली होती.
सीमा घरी आल्यानंतर तिचा दीर अतुल घोडेस्वार हादेखील घरी आला, त्याने रागाच्या भरात घरातील लाकडी धपली भावजईच्या डोक्यात दोनवेळा घातली. या घटनेत सीमा गंभीर जखमी झाल्याने तिला जामखेड येथील हॉस्पिटल नेण्यात आले. मात्र, तोपर्यंत तिचा मृत्यू झाल्याचे डॉक्टरांनी नातेवाईकांना सांगितले. याप्रकरणी मयत सीमा हिचे वडील राजेंद्र आश्रुबा सरोदे (रा. घुमरा. पारगाव ता. पाटोदा जि. बीड) यांनी जामखेड पोलीस स्टेशनला दिलेल्या फिर्यादीवरून पती बाळू अरुण घोडेस्वार व दीर अतुल अरुण घोडेस्वार यांच्याविरोधात जामखेड पोलीस स्टेशनला खुनाचा गुन्हा दाखल करण्यात आला आहे.
जामखेड पोलिस स्टेशनचे पोलीस निरीक्षक महेश पाटील यांच्या मार्गदर्शनाखाली पोलीस उपनिरीक्षक अनिलराव भारती, पोना. संतोष कोपनर, पोकॉ. प्रवीण इंगळे, पोकॉ. प्रकाश मांडगे, पोकाँ. कुलदीप घोळवे, पोकॉ. पळसे, पोकॉ. देशमाने, पोकॉ. नवनाथ रोकडे, पोना. जितेंद्र सरोदे यांच्या पथकाने घटनास्थळी भेट देत काही तासातच अरोपींना अटक केली. पुढील तपास पोलीस निरीक्षक महेश पाटील यांच्या मार्गदर्शनाखाली पोलीस उपनिरीक्षक अनिलराव भारती करत आहेत.
