जळगाव (प्रतिनिधी) जिल्ह्यातील वाळू माफियासह अवैध हातभट्टीवाले आता जिल्हा पोलीस दलाच्या रडारवर आले आहेत. आज जिभाऊ वसंत गायकवाड (34, दापोरा, ता.जळगाव) व ज्ञानेश्वर नामदेव तायडे उर्फ नाना कोळी (32, कोळन्हावी, ता.यावल) या दोघांविरुद्ध ‘एमपीडीए’ची कारवाई करण्यात आली आहे. त्यांची अमरावतीसह नागपूर कारागृहात जिल्हाधिकाऱ्यांचे आदेश मिळताच रवानगी करण्यात आली.
आतापर्यंत कुख्यात गुंड किंवा सराईत गुन्हेगारांविरुद्ध ‘एमपीडीए’सारखी कठोर कारवाई केली जात होती. मात्र, अलीकडच्या काळात प्रथमच जिल्ह्यात अवैधरीत्या वाळू माफिया तसेच अवैधरीत्या हातभट्टी चालवणार्यावर कारवाई झाल्याने जिल्ह्यात खळबळ उडाली आहे. दरम्यान, पोलिसांनी आता वाळू माफियांसह अवैधरीत्या हातभट्टी चालकांची गुन्ह्याची माहिती गोळा करण्याचे काम सुरु केले आहे. त्यामुळे आगामी काळात आणखी काही अवैध दारू विक्रेते आणि वाळू माफियांविरुद्ध मोठी कारवाई होण्याची शक्यता वर्तविण्यात येत आहे.
मागील काही दिवसांपासून पोलीस दलाने कुख्यात गुन्हेगारांविरुद्ध ‘एमपीडीए’ची कारवाईचा जणू सपाटाच लावला आहे. परंतू वाळू माफियांविरुद्ध पोलीस दलाने हत्यार उपसल्याने जिल्ह्याच्या राजकारणासह महसूल विभागातही खळबळ उडाली आहे. राजकीय पाठबळावर वाळू माफिया मुजोर झाले होते. यामुळे सोशल मिडीयासह माध्यमांमध्ये महसूल विभागाची मोठी किरकिरी झाली होती. परंतू आता जळगाव जिल्हा पोलीस दल अॅक्शनमोडवर आल्यामुळे वाळू माफियांमध्ये प्रचंड भीतीचे वातावरण पसरले आहे.
