जळगाव (प्रतिनिधी) शहरातील वादग्रस्त ठरलेल्या श्रीमती ब.गो. शानभाग विद्यालयात शालेय पोषण आहार योजनेतील भ्रष्टाचार प्रकरणी शिक्षण संचालकांच्या आदेशानुसार जि.प. शिक्षण अधिकाऱ्यांनी त्रिसदस्यीय चौकशी समिती नेमली आहे. या चौकशी समितीतुन पाचोरा पंचायत समितीचे गटशिक्षणाधिकारी विकास पाटील यांना त्यांच्या विनंती नुसार वगळण्यात आलं आहे. त्यांच्या जागी आता नवीन सदस्याची नियुक्ती करण्यात आली आहे.
या चौकशी समितीत माझं नाव वगळण्यात यावे, अशी मागणी पाचोरा पंचायत समितीचे गटशिक्षणाधिकारी विकास पाटील यांनी शिक्षणाधिकारी यांना एका पत्राद्वारे केली होती. दरम्यान, शिक्षणाधिकाऱ्यांनी ही मागणी मान्य केली असून विकास पाटील यांचे नाव वगळण्यात आले आहे. तसेच या चौकशी समितीत नवीन अधिकाऱ्याची नियुक्ती करण्यात आली आहे.
शिक्षण संचालक (प्राथ) रा.पुणे यांचे दि. २८ मे २०२१ रोजीचे पत्रातील सुचनानुसार रविंद्र हिंमतराव शिंदे (रा. अयोध्या नगर, जळगाव) यांचा संदर्भात दि. २४ मे २०२१ चा तक्रार अर्जात श्रीमती ब.गो. शानभाग विद्यालय, सावखेडा बु. ता.जि. जळगाव शाळेसंबधी शालेय पोषण आहार योजना अंमलबजावणीमध्ये अपहार केला असल्याबाबत नमुद केले आहे. तरी संदर्भ क्र.१ चे आदेशानुसार सदर शाळेची तक्रार अर्जात नमुद केलेल्या बाबींची चौकशी करणेसाठी खालीलप्रमाणे अधिकारी यांची चौकशी समिती नियुक्ती करण्यात येत आहे.
अशी आहे नवीन चौकशी समिती
सतिष एस. चौधरी (गटशिक्षणाधिकारी, पंचायत समिती, जळगाव), शामकांत एच नाहळदे (लेखा अधिकारी (शापोआ), शिक्षण विभाग (प्राथ) जि.प. जळगाव), अजित ह. तडवी (अधिक्षक (शापोआ), पंचायत समिती, रावेर).
