भुसावळ (प्रतिनिधी) – पोळा सणाचा उत्साह ओसरत असतानाच भुसावळला हादरवून सोडणारी रक्तरंजित घटना गुरुवारी रात्री घडली. शहरातील पाटीलमळा भागात भुसावळ रेल्वेत कार्यरत असलेल्या ३५ वर्षीय तरुणाची चाकूने सपासप वार करून निघृण हत्या करण्यात आली. हत्येचे नेमके कारण अद्याप समोर आलेले नसले, तरी घटनेनंतर पोलिसांनी वेगाने तपासाची चक्रे फिरवत एका अल्पवयीन संशयिताला ताब्यात घेतले आहे.
शहरातील समता नगरमधील तुषार गोविंद सोनवणे (वय ३५) असे मृत तरुणाचे नाव आहे. पोलिसांच्या माहितीनुसार, तुषार सोनवणे हे गुरुवारी रात्री परिचिताची दुचाकी (एमएच- १९, सीएच- १४०५) घेऊन पाटीलमळा परिसरातून जात होते. याचवेळी त्यांचा एका अल्पवयीन संशयिताशी कोणत्या तरी कारणावरून वाद झाला. वादाचे पर्यवसान काही क्षणांतच जीवघेण्या हल्ल्यात झाले. संशयिताने तुषार यांच्या डोक्याच्या मागील बाजूस आणि पाठीवर चाकूने सपासप वार केले. गंभीर जखमांमुळे मोठा रक्तस्त्राव होऊन तुषार यांचा घटनास्थळीच मृत्यू झाल्याचे पोलिसांनी सांगितले. दरम्यान, गुरुवारी रात्री साडेआठ वाजेनंतर या घटनेची माहिती पोलिसांच्या ११२ क्रमांकावर देण्यात आली. माहिती मिळताच बाजारपेठ पोलिसांनी तत्काळ घटनास्थळी धाव घेतली. घटनेचे गांभीर्य लक्षात घेऊन तपासाची चक्रे वेगाने फिरवण्यात
आली. दरम्यान, जळगाव गुन्हे शाखेचे पथक शहरातच असल्याने त्यांनीही तपासात सहभाग घेतला. हल्ल्यानंतर संशयित पायी पसार झाल्याची माहिती मिळताच पोलिसांनी त्याच्या संभाव्य मार्गाचा माग काढला. मिळालेल्या माहितीनुसार, अल्पवयीन संशयिताला पोलिसांनी ताब्यात घेतल्याचे सांगण्यात आले. दरम्यान, पोळा सण उत्साह व शांततेत पार पडल्यानंतर रात्री घडलेल्या या निघृण हत्येने भुसावळच्या शांततेला हादरा बसला आहे. पाटीलमळा परिसरातील या रक्तरंजित घटनेमुळे नागरिकांमध्येही खळबळ उडाली आहे.
वरिष्ठ अधिकारी घटनास्थळी
घटनेची माहिती मिळताच पोलीस उपअधीक्षक केदार बारबोले, बाजारपेठ पोलीस ठाण्याचे निरीक्षक राहुल वाघ यांच्यासह पोलिस पथकाने घटनास्थळी धाव घेतली. घटनास्थळाची पाहणी करण्यात आली. हत्येच्या तपासासाठी फॉरेन्सिक पथकालाही पाचारण केले असून, घटनास्थळावरून महत्त्वाचे पुरावे संकलित करण्यात आले.हत्येमागचे गूढ कायम नेमक्या कोणत्या कारणातून तुषार सोनवणे यांच्यावर जीवघेणा हल्ला करण्यात आला, याचे गूढ अद्याप कायम आहे. वादाचे कारण काय होते हल्ल्यामागे अन्य काही कारण आहे का, तसेच य घटनेत आणखी कोणाचा सहभाग आहे का, या सव् बाबींच्या दिशेने पोलिस तपास करत आहेत.
काही दिवसांपूर्वीच रचला हत्येचा कट
पोलिसांच्या प्राथमिक तपासानुसार, आरोपीने काही दिवसांपूर्वीच तुषारच्या हत्येचा कट रचला होता. आईसोबत तुषारचे मैत्रीपूर्ण संबंध असल्याचा संशय अल्पवयीन आरोपीच्या मनात होता. या संशयातून निर्माण झालेल्या रागातूनच त्याने हा प्रकार केल्याचे पोलिसांनी सांगितले. या प्रकरणी बाजारपेठ पोलिस ठाण्यात गुन्हा दाखल करण्यात आला आहे. पो. नि. राहुल वाघ यांच्या मार्गदर्शनात स.पो.नि. राहुल तायडे तपास करत आहेत.
