जळगाव प्रतिनिधी – शहरातील गिरणा पंपिंग रोड परिसरात मॉर्निंग वॉकसाठी निघालेल्या एका ६८ वर्षीय सेवानिवृत्त वृद्धाला ‘हरिद्वारचे सिद्ध साधू’ असल्याचा बनाव करून भामट्यांनी हातचलाखीने लुटले. कारमधून आलेल्या दोघांनी पत्ता विचारण्याच्या बहाण्याने वृद्धाला जवळ बोलावून त्यांच्या हातातील तब्बल ७० हजार रुपये किमतीची सोन्याची अंगठी काढून ते पसार झाले. ही घटना उघडकीस आल्यानंतर वृद्धाने रामानंद नगर पोलिसात तक्रार दिली असून त्यानुसार गुन्हा दाखल करण्यात आला आहे.
शहरातील गुलमोहर हौसिंग सोसायटी, गिरणा पंपिंग रोड येथे राहणारे दिलीप बाबूराव सुरवाडे (वय ६८) हे नेहमीप्रमाणे सकाळी साडेसहा वाजेच्या सुमारास मॉर्निंग वॉक संपवून पायी घरी परतत होते. वाघनगर जवळील ‘जय भवानी कॅटरर्स’च्या गोदामासमोर रस्त्यावरून जात असताना, गिरणा पंपिंग रोडच्या बाजूने एक पांढऱ्या रंगाची, विना नंबरची मारुती सुझुकी चारचाकी गाडी त्यांच्याजवळ येऊन थांबली. गाडीमध्ये एक चालक आणि मागे एक निर्वस्त्र बसलेला व्यक्ती असे दोघे जण होते. चालकाने सुरवाडे यांना गाडीतूनच यहाँ भोलेनाथ का मंदीर कहाँ है? अशी विचारणा केली. सुरवाडे यांनी रेल्वे पुलाकडे सरळ जाण्याचा रस्ता सांगितला. मात्र, मला ऐकू येत नाही, पुढे येऊन सांगा, असे चालकाने म्हटल्याने सुरवाडे गाडीजवळ गेले. तेव्हा चालकाने सांगितले की, गाडीमध्ये हरिद्वारहून साधू आले आहेत, तुम्ही त्यांच दर्शन घ्या. वृद्ध सुरवाडे यांनी त्या दोघ संशयितांना अंगठी परत मागितली असता, रुको जरा, रुको जरा असे म्हणत चालकाने गाडीचा वेग वाढवून तिथून पळ काढला. रस्त्यावर कोणीही नसल्याने मदतीसाठी केलेली आरडाओरड निष्फळ ठरली. याप्रकरणी सुरवाडे यांच्या तक्रारीवरून पोलिसांनी फसवणुकीचा गुन्हा दाखल केला असून विना नंबरच्या वाहनाचा आणि संशयितांचा शोध सुरू केला आहे.
पैसे नको आशिर्वाद द्या म्हणताच काढली अंगठी
सुरवाडे यांनी गाडीच्या क्लिन बाजूला जाऊन हात जोडले असता त्या निर्वस्त्र व्यक्तीने खिडकीची काच खाली करून आशीर्वाद म्हणून सुरवाडे यांच्या हातात १०० रुपयांची नोट ठेवली. सुरवाडे यांनी मला पैसे नको, फक्त आशीर्वाद द्या, असे म्हणताच त्या भामट्याने हातचलाखी केली. त्याने क्षणात सुरवाडे यांच्या उजव्या हाताच्या पहिल्या बोटातील पुष्कराज खडा असलेली १० ग्रॅम वजनाची सोन्याची अंगठी काढून घेतली.
