नंदुरबार, (प्रतिनिधी) : नंदुरबार रेल्वे पोलिसांनी बेवारस अवस्थेत आढळलेल्या नवजात शिशूच्या पालकांचा शोध घेण्यासाठी नागरिकांना आवाहन केले आहे. या प्रकरणातील संबंधित महिलेची ओळख पटविण्यासाठी पोलिसांकडून माहिती संकलित केली जात असून, तिच्याबाबत किंवा या घटनेशी संबंधित कोणतीही माहिती देणाऱ्यास १० हजार रुपयांचे बक्षीस देण्यात येणार असल्याचे रेल्वे पोलिसांनी जाहीर केले आहे.
पोलिसांनी दिलेल्या माहितीनुसार, दि. ९ मे २०२५ रोजी ट्रेन क्रमांक १९००८ भुसावळ-सुरत एक्स्प्रेसच्या जनरल कोचमध्ये अंदाजे एक महिन्याच्या शिशूचे पालनपोषण व पोषण न करण्याच्या उद्देशाने त्याला सोडून देण्यात आले होते. धरणगाव ते अमळनेर रेल्वे स्थानकादरम्यान ही घटना घडल्याचे तपासात समोर आले आहे.
या प्रकरणी रेल्वे पोलीस ठाणे, नंदुरबार येथे गुन्हा रजिस्टर क्रमांक ४८/२०२५, कलम ९४ बी.एन.एस. अन्वये गुन्हा दाखल करण्यात आला आहे. पोलिसांच्या तपासानुसार, संबंधित महिला अंदाजे २० ते २२ वर्षे वयोगटातील असल्याची माहिती देण्यात आली आहे.
या महिलेबाबत अथवा बेवारस नवजात शिशूच्या पालकांबाबत कोणाला काही माहिती असल्यास ती रेल्वे पोलीस स्टेशन, नंदुरबार येथे कळवावी, असे आवाहन करण्यात आले आहे. माहिती देणाऱ्याचे नाव गोपनीय ठेवण्यात येणार असून, उपयुक्त माहिती मिळाल्यास १० हजार रुपयांचे रोख बक्षीस देण्यात येईल.
या प्रकरणाच्या तपासासाठी रेल्वे पोलिसांचे प्रभारी अधिकारी राहुल ब्रंबक शेजवळ यांच्या मार्गदर्शनाखाली कार्यवाही सुरू आहे. नागरिकांनी संवेदनशीलता दाखवत उपलब्ध माहिती पोलिसांपर्यंत पोहोचवावी, असे आवाहन करण्यात आले आहे.
संपर्क : ७०३०४४७००७ / ८७८८१५७८५८
