एरंडोल (प्रतिनिधी) शहरातील शेतकी संघाच्या कॉम्प्लेक्समधील मोबाईल दुकानातून पावणेतीन लाखांचे मोबाईल लांबवणाऱ्या दोघांना जळगाव एलसीबीच्या पथकाने अटक केली आहे. टिकाराम कोमल मोरे (28, एरंडोल) व पंकज मंगल वाघ (30, हिंगोणा, ता.धरणगाव) अशी अटकेतील आरोपींची नावे आहेत.
गोपाल देविदास दांडगे (38, अष्टविनायक कॉलनी, एरंडोल) यांच्या शेतकी संघ कॉम्प्लेक्समधील गाळा क्रमांक 11 मध्ये हरीओम एंटरप्रायजेस नामक दुकान असून 3 जुलै रोजी सायंकाळी सात ते 4 रोजी सकाळी दहा दरम्यान अज्ञात चोरट्यांनी संधी साधून दुकानाचे शटरचे कुलूप तोडून दुकानात प्रवेश केला होता. त्यानंतर चोरट्यांनी तीन हजारांच्या रोकडसह 19 मोबाईल असा एकूण दोन लाख 88 हजार 810 रुपयांचा मुद्देमाल लांबवला होता.
जळगाव स्थानिक गुन्हे शाखेचे पोलीस निरीक्षक किसन नजन पाटील यांच्या पथकातील पोलीस उपनिरीक्षक गणेश वाघमारे, पोलीस हेड कॉन्स्टेबल लक्ष्मण पाटील, अक्रम शेख, संदीप सावळे, महेश महाजन, पोलीस नाईक नंदलाल पाटील, प्रमोद लाडवंजारी, किरण धनगर, भगवान पाटील, राहुल बैसाणे, ईश्वर पाटील, लोकेश माळी, महिला पोलीस नाईक उपाली खरे, भरत पाटील, प्रमोद ठाकूर यांच्या पथकाने रविवार, 9 रोजी दोघा आरोपींना गोपनीय माहितीच्या आधारे ताब्यात घेतल्यानंतर त्यांनी गुन्ह्याची कबुली देत चोरीतील नऊ मोबाईल काढून दिले.
दरम्यान, या गुन्ह्यातील अन्य संशयित प्रवीण बागुल हा पोलिसांना पाहून पसार झाला असून त्याचाही कसून शोध सुरू आहे. तपास पोलीस निरीक्षक सतीश गोराडे यांच्या मार्गदर्शनाखाली पोलीस उपनिरीक्षक शरद बागल करीत आहे.
