जामनेर (प्रतिनिधी) तालुक्यातील पहूर सोनाळा गावाच्या शिवारात तरुणाचा दगडाने ठेचून खून झाल्याचा प्रकार मंगळवारी संध्याकाळी उघडकीस आल्यानंतर प्रचंड खळबळ उडाली होती. बाळू उर्फ प्रमोद भगवान वाघ (३५, शिंगाएत, ता. जामनेर) असे मृताचे नाव आहे.
जामनेर रस्त्याला जोडणारा व सोनाळा गावात जाणारा कच्चा वहिवाटी रस्ता आहे. याठिकाणी प्रफुल्ल भारत पाटील (सोनाळा ) यांचे शेत आहे. संध्याकाळी ४ वाजता प्रफुल्ल पाटील शेतात आल्यावर त्यांना मद्याच्या बाटल्य, चप्पल व रक्ताने माखलेला दगड आढळला. त्यानंतर त्यांना रक्ताने माखलेला मृतदेह आढळला. त्यांनी तात्काळ ही माहिती पोलिसांना दिली. बाळू उर्फ प्रमोद भगवान वाघ व मारेकरी हे दुचाकीवरून याठिकाणी आले होते. दुचाकी (एमएच १२ / सीएस ३१७२) या क्रमांकाची होती. याठिकाणी दारू प्यायल्यानंतर बाळू उर्फ प्रमोद भगवान वाघ याचा दगडाने ठेचून खून करण्यात आला. तसेच मृतदेह कोणाला दिसू नये, यासाठी मक्याच्या शेतात ओढत नेऊन फेकले अन् दुचाकीवरून मारेकरी फरार कळते.
पाच तास ओळख पटविण्यासाठी पोलिस अधिकारी व कर्मचारी प्रयत्नशील होते. मृतदेहाच्या अंगातील कपडे चॉईस टेलर जामनेर यांच्याकडून शिवलेल्याचे लेबल आढळले. या लेबलवरून जामनेर पोलिसांनी टेलरशी संपर्क केला तर तरुण हा बाळू उर्फ प्रमोद भगवान वाघ (३५, शिंगाएत, ता. जामनेर) असल्याची प्राथमिक माहिती मिळाली. पोलिसांनी त्याच्या नातेवाइकांना ओळख पटवण्यासाठी बोलविले. नातेवाईक घटनास्थळी दाखल होऊन पाहणी प्रमोद वाघ असल्याची खात्री नातेवाईक यांना झाल्याने ओळख निष्पन्न झाल्याचे पोलिसांनी सांगितले.
