कासोदा ता. एरंडोल (प्रतिनिधी) तालुक्यातील उत्राण (गु.ह.) येथे वडीलोपार्जित घराच्या वादावरुन मोठ्या भावाने लहान भावाचा खून केल्याची घटना उघडकीस आल्यानंतर प्रचंड खळबळ उडाली आहे.
तालुक्यातील भातखंडेच्या जवळ गिरणा नदीपात्रात एका इसमाचा मृतदेह आढळून आला होता. त्यानंतर हा मृतदेह सत्यवान धोंडू महाजन यांचा असल्याची ओळख पटली. पोलिसात तपासात त्यांचा खून झाल्याची धक्कादायक माहिती तपासात निष्पन्न झाली. पोलिसात तपासात सत्यवान महाजन यांचा खून त्यांचाच मोठा भाऊ भगवान धोंडू महाजन याने केल्याचेही समोर आले. यानंतर त्याला अटक करण्यात आली आहे. पोलिस चौकशीत भगवान महाजन याने गुन्ह्याची कबुली देत घटनाक्रम सांगितला. यानुसार भगवान महाजन ( वय६२) आणि सत्यवान महाजन (वय ५५) हे दोन्ही भाऊंमध्ये एकाच घरात राहत असल्यामुळे त्यांच्यात अनेकदा वाद होत होते. दोघांमध्ये वडीलोपार्जित घराच्या वाद देखील होता. दि. १२ सप्टेंबर रोजी सत्यवान महाजन यांनी घरातील मोरीत लघुशंका केल्यावरून दोघांमध्ये झालेल्या वादातून संतापलेल्या भगवान याने डोक्यात मुसळी चार ते पाच वेळेस मारल्याने सत्यवान महाजन यांचा जागीच मृत्यू झाला. यानंतर भगवानने घरातील पलंगाखाली मृतदेह लपवून ठेवला. तसेच मयताचे पडलेले रक्त कापडाने व गोणपाटाने पुसुन टाकले. यानंतर रात्री उशीरा त्याने पोत्यातून सायकलवरुन नेत मृतदेह नेर गिरणा नदीच्या पात्रात फेकून दिला. या घटनेनंतर भगवान गायब झाला. शेवटी उत्राणच्या पोलीस पाटलांनी पोलिसांच्या मदतीने एरंडोल स्थानकावरून भगवान महाजन याला अटक करण्यात आली. या संदर्भात कासोदा पोलीस स्थानकात पोहेकॉ समाधान सिंहले यांच्या फिर्यादीवरून गुन्हा दाखल करण्यात आला असून पुढील तपास सपोनि निता कायटे ह्या करीत आहेत.
