पुणे (वृत्तसंस्था) पुरंदर तहसील कार्यालयातून चक्क ईव्हीएम मशीनची चोरी झाल्याची खळबळजनक घटना उघडकीस आली आहे. याप्रकरणी तीन अज्ञात चोरट्यांविरुद्ध पोलिसांत गुन्हा दाखल करण्यात आला आहे. दरम्यान, तिघं चोरटे सीसीटीव्हीत कैद झाले असून त्यांचा कसून शोध पोलिसांनी सुरु केला आहे.
ईव्हीएम मशीन चोरीचे वृत्त समजताच पुण्याचे जिल्हाधिकारी डॉ. राजेश देशमुख, जिल्हा ग्रामीण पोलीस अधीक्षक डॉ. पंकज देशमुख यांनी घटनास्थळाची पाहणी करून दिवसभर कसून चौकशी केली. आरोपींचा शोध घेण्यासाठी सहा पोलीस पथके तयार करण्यात आली आहेत. तसेच, कर्तव्यात कसूर केल्यावरून ड्युटीवर असलेले सहाय्यक पोलीस फौजदार डी. एल. माने, तसेच होमगार्ड जवान राहुल जरांडे यांना निलंबित केल्याची माहिती जिल्हाधिकारी डॉ. राजेश देशमुख यांनी प्रसारमाध्यमांशी बोलताना दिली आहे.
सोमवारी नेहमीप्रमाणे सकाळी नियमित कामकाजासाठी सर्व कर्मचारी आले असता, तहसील कार्यालयामधील ईव्हीएम मशीन ठेवलेल्या स्ट्राँग रूमचा दरवाजा उघडलेला दिसून आला. लगेचच घटनास्थळाची पाहणी करून पंचनामा करण्यात आला. त्यामध्ये मतदान करण्याच्या डेमो (प्रात्यक्षिक) मशीनसह काही कागदपत्रांची चोरी झाल्याचे उघड झाले. त्यामुळे लगेचच तपासाची सूत्रे हलवण्यात आली. पुणे येथून डॉग पथक, ठसे तज्ज्ञ, पुणे येथील स्थानिक गुन्हे अन्वेषण विभागाचे पोलीस निरीक्षक अविनाश शिळीमकर यांनी तपास सुरू केला. रविवार ड्युटीवर असलेले सहाय्यक फौजदार डी. एल. माने आणि होमगार्ड जवान राहुल जरांडे यांना कर्तव्यात कसूर केल्याप्रकरणी निलंबित करण्यात आले आहे.
रविवार सुट्टी असल्याने कार्यालय बंद होते. साहजिकच कार्यालयाचा मुख्य तसेच पूर्वेकडील असे दोन्ही दरवाजे बंद होते. चोरटे पूर्वकडील बाजूकडून छतावर चढले. तेथून झाडावरून कार्यालयाच्या आवारात उतरले. त्यांनतर स्ट्रॉग रूमचे कुलूप उघडून आतमध्ये प्रवेश केला. तसेच चोरी केल्यानंतर दरवाजा उघडून बाहेर पसार झाले. दरम्यान, या घटनेमुळे राज्यात एकच खळबळ उडाली आहे. याबाबतचे वृत्त आज ‘पुण्य नगरी’सह विविध प्रसार माध्यमांनी दिले आहे.
