अमरावती (वृत्तसंस्था) तालुक्यातील नाचोना येथे घराच्या अंगणात बसलेल्या सहा जणांना गावातीलच अवैध दारू विक्रेत्याने पूर्ववैमनस्यातून आपल्या कारने चिरडले. त्यात तिघांचा मृत्यू झाला. तर तिघे गंभीर जखमी झाले. त्यांच्यावर रुग्णालयात उपचार सुरू आहेत. ही खळबळजनक घटना मंगळवारी (ता. १९) रात्री ८ वाजताच्या सुमारास घडली.
अनुसया श्यामराव अंभोरे (६५), श्यामराव लालुजी अंभोरे (७०) व अनारकली मोहन गुजर (४३) अशी मृतकांची तर शारदा उमेश अंभोरे (३६), उमेश श्यामराव अंभोरे (४२) आणि किशोर श्यामराव अंभोरे (३८) अशी जखमींची नावे आहेत. घटनेतील मृतक व जखमी खल्लार ठाण्याच्या हद्दीतील नाचोना येथील रहिवाशी असून गावातीलच अवैध दारू विक्रेत्यासोबत त्यांचा वाद असल्याचे माहिती समोर येत आहे.
घटनेच्या दिवशी पीडित कुटुंब घरातील अंगणात गप्पागोष्टी करत होते. त्याचवेळी आरोपीने आपली कार पीडित कुटुंबाच्या घराजवळ नेली. त्यावेळी घराजवळ उभे असलेल्या कुटुंबातील काही सदस्यांच्या अंगावर त्याने जाणून बुजून कार घातली आणि त्यांना कार खाली चिरडले. आरोपी हा गावात बेकायदेशीरपणे दारु विक्री करत असून कायम दारूच्या नशेत असल्याचा आरोप ग्रामस्थांनी केला आहे. तर आपल्या दारू व्‍यवसायाची माहिती अंभोरे कुटुंबीय पोलिसांना देत असल्याचा संशय त्‍याला होता. यामुळे सुडाने पेटलेल्‍या दारू विक्रेत्याने मंगळवारी रात्री अंभोरे कुटुंबीयांच्‍या घरासमोर चारचाकी वाहन आणले आणि घरासमोर उभे असलेल्या सहा जणांच्‍या अंगावर नेले. या घटनेत तिघांचा जागीच मृत्यू झाला.
