जळगाव (प्रतिनिधी) सर्वत्र दहीहंडीचा उत्सव सुरु असतांना भास्कर मार्केटसमोरील एका हॉटेलमध्ये दारु पित असलेल्या टोळक्याने गोळीबार केला. ही घटना मंगळवारी सायंकाळी साडेसात वाजेच्या सुमारास घडली. गोळीबार केल्यानंतर त्या टोळक्याने हॉटेलमधून पळ काढून ते पसार झाले. ही संपुर्ण घटना सीसीटीव्ही फुटेजमध्ये कैद झाली असून पोलिस संशयीताचा शोध घेत आहे.
मोठा आवाज झाल्याने हॉटेलमधील कर्मचारी भेदरले !
शहरातील भास्कर मार्केटसमोरील हॉटेल शालीमार येथे रविवारी सायंकाळी काही तरुण दारु पिण्यासाठी आले. दारु पित असतांना अचानक त्या टोळक्यातील एकाने त्याच्याजवळील पिस्तुल काढून जमीनीवर गोळीबार केला. मोठा आवाज झाल्याने हॉटेलमधील कर्मचारी घाबरुन गेले. गोळीबार केल्यानंतर त्या टोळक्याने हॉटेलचे बील भरुन तेथून पळ काढला. हॉटेल मधील कर्मचाऱ्यांनी घटनेची माहिती हॉटेल मालकाला दिली. त्यांनी लागलीच घटनेची माहिती जिल्हापेठ पोलीसांना कळविली.
पोलिस अधिकाऱ्याने हॉटेल चालकाला भरला दम
पोलिस तीन तास उशिराने घटनास्थळी दाखल झाल्यानंतर एलसीबीचे पथक देखील त्याठिकाणी आले. दरम्यान, जिल्हापेठ पोलीस ठाण्याचे पोलीस निरीक्षकांनी हॉटेल चालकाला पत्रकारांना माहिती किंवा सीसीटीव्ही फुटेज देवू नका, अन्यथा तुम्हाला देखील या गुन्ह्यात आरोपी करु असा दम पोलीस निरीक्षक राकेश मानगावकर यांनी हॉटेल चालकाला भरला.
तीन तासानंतर आले पोलिस
गोळीबार झाल्याची घटना ही सायंकाळी सात-साडेसात वाजेची आहे. मात्र जिल्हापेठ पोलीस ठाण्याचे कर्मचारी सुमारे तीन तासानंतर म्हणजेच रात्री साडेदहा वाजेच्या सुमारास घटनास्थळी दाखल झाले. त्यानंतर पोलिसांकडून चौकशील सुरुवात झाली. तपासणीत हॉटेलमधून गोळीबार केलेला रिकामा रऊंड मिळून आला. ही संपुर्ण घटना सीसीटीव्ही कॅमेऱ्यात कैद झाली असून पोलिसांकडून संशयिताचा शोध घेतला जात आहे.
