पाळधी ता. धरणगाव (प्रतिनिधी) येथील दोनगाव रस्त्यावरील एका बँकेच्या जवळ लावलेल्या शिवसेनच्या एका रुग्णवाहिकेची रात्री अज्ञात समाजकंटकानी तोडफोड केल्याची धक्कादायक घटना उघडकीस आली आहे. विशेष म्हणजे घटनास्थळी आगपेटी सापडल्यामुळे रुग्णवाहिका जाळण्याचाही प्रयत्न होता का?, अशी शंका उपस्थित केली जात होती.
या संदर्भात अधिक असे की, पाळधी खुर्द भागात दोनगाव रस्त्यावरील एका बँकेजवळ गावातील अनेक चारचाकी वाहने रात्रीच्या लावलेली असतात. याच ठिकाणी शिवसेनेच्याही दोन रुग्णवाहिका नेहमी उभ्या असतात. मोफत सेवा असल्यामुळे ग्रामीण भागातील रुग्णांना याचा लाभ होत असतो. आज पहाटे ग्रामीण भागातील एका रुग्णाला तातडीने जळगावला रुग्णालयात दाखल करावयाचे असल्याने चालक रुग्णवाहिका घेण्यासाठी गेला असता एका रुग्णवाहिकेची आतून तोडफोड झालेली होती.
तर दुसऱ्या एका रुग्णवाहिकेवरील मुख्यमंत्र्यांसह पालकमंत्र्यांचे फोटो असलेले स्टीकर फाडण्यात आलेले होते. एवढेच नव्हे तर घटनास्थळी आगपेटी सापडल्यामुळे रुग्णवाहिका जाळण्याचाही प्रयत्न होता का?, अशी शंका उपस्थित केली जात होती. राजकीय द्वेषातून ही घटना घडल्याची शक्यता वर्तवली जात आहे. शेवटचे वृत्त हाती आले तेव्हा याबाबत पोलिसात तक्रार करण्यासाठी चालक हरी माळी पोहचलेला होता. तर घटनेची माहिती मिळताच पोलीस निरीक्षक उद्धव ढमाले हे घटनास्थळी पोहचले होते.
