यावल (प्रतिनिधी) प्रेमभंग झाल्याने तालुक्यातील किनगाव बु. येथील एका २७ वर्षीय तरुणाने आत्महत्या केल्याची घटना उघडकीस आली आहे. यामुळे किनगाव परिसरात खळबळ उडाली आहे. दरम्यान, आत्महत्येपूर्वी भिंतीवर प्रेमभंग झाल्याने आपण आत्महत्या करीत असल्याचे या तरुणाने लिहून ठेवले.
यासंदर्भात अधिक असे की, किनगाव बु. (ता. यावल) येथील जिल्हा परिषद शाळेजवळ राजू महाजन कुटुंबासह राहतात. बुधवारी ते त्यांची पत्नी, लहान मुलगा व लहान मुलाची पत्नी त्यांचेसह सर्व शेतात कामाला गेले होते. तर त्यांचा अविवाहित मोठा मुलगा समाधान महाजन (वय २७) हा घरी एकटा होता. महाजन कुटुंबीय सायंकाळी साडेपाचला शेतातून घरी परतले असता त्यांचा मोठा अविवाहित मुलगा समाधान महाजन हा गळफास घेतलेल्या अवस्थेत त्यांना घरात आढळून आला. सदर प्रकार पाहून महाजन कुटुंबीय प्रचंड हादरले.
याबाबतची माहिती पोलिसांना दिली असता घटनास्थळी पोलिस उपनिरीक्षक जितेंद्र खैरनार पथकासह दाखल झाले. त्यांनी घटनास्थळाचा पंचनामा करून मृतदेह यावल ग्रामीण रुग्णालयात पाठवला. समाधान याने आत्महत्येपूर्वी भिंतीवर प्रेमभंग झाल्याने आपण आत्महत्या करीत असल्याचे लिहिलेले आढळून आले. समाधान महाजन याने बारावीनंतर आयटीआयचे शिक्षण करून तो वडिलांसोबत शेतीकाम करायचा. याप्रकरणी यावल पोलिसात मयत समाधान महाजन यांचा भाऊ योगेश महाजन यांनी दिलेल्या खबरवरून अकस्मात मृत्यूची नोंद करण्यात आली असून पुढील तपास सहायक फौजदार अजित शेख हवालदार नरेंद्र घुले करीत आहेत.
