सटाणा (वृत्तसंस्था) चारित्र्याच्या संशयावरून डोक्यात लोखंडी मुसळी मारून पत्नीचा खून केल्याची धक्कादायक घटना समोर आली आहे. संशयिताने पत्नीची हत्या केल्यानंतर घरात अज्ञात कारणातून झालेल्या झटापटीनंतर पत्नी बेपत्ता झाल्याचा बनाव रचून पोलिसांचीही दिशाभूल करण्याचा प्रयत्न केला. मात्र, पोलिसांनी या घटनेचा सखोल तपास करून संशयित पती आधार माळी याला बेड्या ठोकल्या, न्यायालयात हजर केले असता न्यायालयाने त्याला दि. २ मेपर्यंत पोलीस कोठडी सुनावली आहे.
बागलाण तालुक्यातील केरसाणे येथील विवाहिता सरला आधार माळी (वय ३५) यांच्याबरोबर घरात कोणाची तरी अज्ञात कारणातून झटापट झाल्यानंतर त्या घरातून बेपत्ता झाल्याचा बनाव करीत, पती संशयित आधार हरचंद माळी याने त्याच्या मित्रासह गुरुवारी (दि. २५) रात्रीच्या सुमारास सटाणा पोलीस ठाणे गाठले. यावेळी त्याने पोलिसांत दिलेल्या तक्रारीत म्हटले की, तो सायंकाळी सहा वाजेच्या सुमारास कामावरून घरी आला असताना घराचे दोन्ही दरवाजे उघडे होते, घरात त्याची पत्नी सरला ही कोठेही आढळून आली नाही. तिच्या हातातील बांगड्या फुटून काचा पडलेल्या आणि डोक्याच्या पिना, स्कार्फ घरात अस्तव्यस्त पडलेला असल्याने काहीतरी झटापट होऊन ती घरातून बेपत्ता झाली आहे. त्याने पत्नीचा आजू बाजूला व नातेवाईकांकडे शोधही घेतला; परंतु ती मिळून आली नाही. त्यामुळे त्याने पोलिसांत फिर्याद दिली. या तक्रारीचे गांभीर्य ओळखून पोलीस निरीक्षक बाजीराव पोवार यांनी तत्काळ तपासाची चक्रे फिरवत केरसाणे गाठले. त्यांच्यासमवेत सहायक निरीक्षक उज्वलसिंह राजपूत व पोलीस कर्मचाऱ्यांच्या पथकाने मध्यरात्रीच घटनास्थळी पाहणी केली, तसेच गावचे पोलीस पाटील कांतीलाल सोनवणे व स्थानिकांच्या मदतीने शोध घेण्यास सुरुवात केली. यावेळी घराच्या बाजूलाच असलेल्या वीस ते पंचवीस फूट खोल खड्यातील डाळिंबाच्या शेतात सरला माळी यांचा मृतदेह आढळून आला. हा मृतदेह शवविच्छेदनासाठी नाशिक जिल्हा शासकीय रुग्णालयात पाठविण्यात आला.
शवविच्छेदनात सरला माळी यांचा मृत्यू डोक्यामध्ये जड व बोथट वस्तूचा मार लागल्याने झाल्याची बाब समोर आली. त्यामुळे तिची हत्या झाल्याचे स्पष्ट झाल्याने तिचा भाऊ आनंदा पंडित सोनवणे यांनी सटाणा पोलीस ठाण्यात फिर्याद दिली. त्यानुसार पोलिसांनी गुन्हा दाखल करून तपासाची चक्रे फिरवित सरलाचा पती संशयित आधार माळी याची कसून चौकशी केली. यावळी त्याने चारित्र्यावर संशय घेऊन झालेल्या वादात सरला माळी हिच्या डोक्यात व बरगड्यांवर लोखंडी मुसळीने जोरदार प्रहार करून तिला जिवे ठार मारल्याची कबुली दिल्याचे पोलिसांनी सांगितल्याने संशयित आधार माळी यास बेड्या ठोकून न्यायालयात हजर केले. यावेळी न्यायालयाने त्यास दि.२ मेपर्यंत पोलीस कोठडी सुनावली आहे. अपर पोलीस अधीक्षक अनिकेत भारती, उपअधीक्षक नितीन गणापुरे यांच्या मार्गदर्शनाखाली पोलीस निरीक्षक बाजीराव पोवार, सहायक निरीक्षक उज्वलसिंह राजपूत, हवालदार जिभाऊ पवार, राजेंद्र जगताप, योगेश शेवाळे, रूपेश ठोके, नाईक योगेश पवार, नितीन जगताप, शिपाई संतोष चव्हाण, योगेश साळुखे, रवी शिंदे, चालक गणेश गरुड यांच्या पथकाने ही कारवाई केली.
पोलिसांची दिशाभूल करण्याचा प्रयत्न !
संशयित माळी हिचा खून केल्यानंतर घराशेजारील खड्ड्यांतील शेतात तिचा मृतदेह नेऊन टाकला. त्यानंतर पत्नीच्या नातेवाईकांना व त्याच्या मित्रांना, तसेच शेतवस्तीवरील लोकांना पत्नीसोबत काहीतरी बरेवाईट घडल्याचे सांगत बनाव करून तिचा शोध घेण्याचे नाटकही केले, तसेच मित्रासोबत सटाणा पोलीस ठाण्यात त्याची पत्नी सरला माळी बेपता झाल्याची खोटी तक्रार देऊन पोलिसांची दिशाभूल करण्याचा प्रयत्न केला.
श्वान पथक, ठसे तज्ज्ञाच्या मदतीने गुन्ह्याचा उलगडा !
आधार माळी याच्या तक्रारीनुसार घरात झटापटीनंतर सरला माळी बेपता झाल्याच्या घटनेत घातपाताची शक्यता लक्षात घेऊन पोलिसांनी तत्काळ घटनास्थळी धाव घेत तपास सुरू केला; परंतु सरला माळी यांचा मृतदेह आढळून आल्यानंतर त्यांचा खून झाल्याचे समोर आल्याने पोलिसांनी उपलब्ध परिस्थिती जन्य पुरावे व तांत्रिक माहितीच्या आधारे या गुन्ह्याचा उलगडा करण्याचा प्रयत्न केला, तसेच श्वान पथक व ठसे तज्ज्ञांचीही मदत घेतली. यातून मिळालेल्या सुगाव्याच्या आधारे काही तासांच्या आत पोलिसांनी या गुन्ह्याचा उलगडा करीत संशयित पती आधार माळीच्या मुसक्या आवळल्या
