भुसावळ (प्रतिनिधी) महामार्गाच्या लगत साकरी-फेकरीदरम्यान शुक्रवारी रात्री साडेदहा वाजेच्या सुमारास गोळीबारच्या घटनेने भुसावळ पुन्हा एकदा हादरले आहे. यात भुसावळातील दोन युवक जखमी झाले आहेत. जखमींवर डॉ. उल्हास पाटील वैद्यकीय महाविद्यालय व हॉस्पिटलमध्ये उपचार सुरू आहेत. या घटनेमुळे शहरात एकच खळबळ उडाली आहे.
साकरी फाटा ते फेकरी उड्डाणपुलादरम्यान शुक्रवारी रात्री साडेदहा वाजेच्या सुमारास अक्षय सोनवणे, मंगेश काळे आणि त्यांचा एक मित्र असे तिघे जेवणासाठी हॉटेलवर जात होते. यावेळी त्यांची तीन जणांसोबत जुन्या वादातून बाचाबाची झाली. यात काळे आणि सोनवणे या दोघांवर संशयितांनी गोळीबार केला. दोघांना प्रत्येकी एक गोळी लागली आहे. घटनेची माहिती मिळताच अप्पर पोलिस अधीक्षक चंद्रकांत गवळी, डीवायएसपी सोमनाथ वाघचौरे, पोलिस निरीक्षक विलास शेंडे आदींनी हॉस्पिटलमध्ये जखमींची भेट घेऊन विचारपूस केली. संशयीत खडका येथील रहिवासी असल्याची माहिती पोलिसांना मिळाली आहे. त्यानुसार पोलिस संशयितांचा शोध घेत आहेत.
