पुणे (वृत्तसंस्था) जिल्ह्यातील दौंड तालुक्यातील वरवंड येथील एका डॉक्टरने पत्नी आणि आपल्या दोन पोटच्या मुलांचा खून केल्याची घटना उघडकीस आल्यानंतर प्रचंड खळबळ उडाली आहे. धक्कादायक म्हणजे डॉक्टरने स्वत:ही गळफास घेत आपली जीवनयात्रा संपवली. मंगळवारी सायंकाळच्या सुमारास हा प्रकार घडला आहे. डॉ अतुल शिवाजी दिवेकर, पत्नी-पल्लवी-अतुल दिवेकर, वेदांतीका (मुलगी),अदत्विक (मुलगा) अशी मृतांची नावे आहेत.
अतुल शिवाजी दिवेकर वरवंड येथील चैताली पार्क येथे कुटुंबासमवेत राहत होते. मंगळवारी दुपारी परिसरातील एका व्यक्तीने त्यांच्या घराचा दरवाजा ठोठावला. आतून काही प्रतिसाद येत नसल्याने खिडकीतून डोकावून पाहिले असता, त्यांना अतुल यांचा मृतदेह गळपास घेतलेल्या अवस्थेत दिसून आला. संबधित व्यक्तीने आरडाओरड केल्यानंतर परिसरातील नागरिक जमा झाले. त्यांनी दार उघडून बघितले असता, अतूल यांच्यासोबत त्यांच्या पत्नीचा मृतदेह खाली पडलेला होता.
घटनेची माहिती मिळताच पोलिस तातडीने घटनास्थळी पोहचले. पोलिसांनी घराची पाहणी केली असता अतुल यांच्या मृतदेहाजवळ एक चिठ्ठी सापडली. यामध्ये मी पत्नीचा गळा आवळून व दोन मुलांना विहिरीत टाकून त्यांचा खून केला. तर मी स्वतः आत्महत्या करीत असल्याचे म्हटले होते. त्यानुसार पोलिसांनी संबधीत विहिरीत पाहणी केली. दोघं मुलांचे मृतदेह विहिरीत आढळून आले आहेत. दरम्यान, डॉ.अतुल दिवेकर हे व्यवसायाने गुरांचे डॉक्टर म्हणून काम पाहत होते, तर पत्नी पल्लवी दिवेकर या श्री गोपीनाथ माध्यमिक विद्यालयात शिक्षक म्हणून कार्यरत होत्या. या घटनेने परिसरात एकच खळबळ उडाली आहे.
