अडावद ता. चोपडा (प्रतिनिधी) लहान भावाने धारदार विळ्याने मोठ्या भावाचा खून केल्याची धक्कादायक घटना दि.२५ मार्च शनिवारी दुपारी तालुक्यातील पारगाव शिवारात शनिवारी दुपारी घडली. संदीप प्रताप पाटील (३६) असे खून झालेल्या युवकाचे नाव आहे.
मितावली येथील प्रताप मंगा पाटील हे पत्नी, दोन मुलांसह राहतात. त्यांच्याकडे १० एकर शेती आहे. त्यांची दोन्ही मुले एकत्रित शेती करतात. शनिवारी सकाळी संदीप पाटील (३६) व सतीश पाटील (३३) हे शेतात भेंडी तोडण्यासाठी गेले होते. तेथे कुटुंबातील विषयावरून दोघांमध्ये वाद झाला. त्यावेळी सतीश याने मोठा भाऊ संदीप याच्यावर धारदार विळ्याने वार करून त्याचा खून केला. गावापासून शेत दूर असल्याने घटना लवकर उघडकीस आली नाही. संशयित आरोपी शेतातच थांबून होता. अडावदचे एपीआय गणेश बुवा, फौजदार चंद्रकात पाटील, सहायक फौजदार सुनील तायडे, जयदीप राजपूत हे घटनास्थळी पोहचल्यानंतर संशयित आरोपी सतीश पाटील यास ताब्यात घेतले. पोलिसांनी घटनास्थळी जळगाव येथून ठसे तज्ज्ञांना पाचारण केले होते. दरम्यान, पत्नी सोबत अनैतिक संबंधाच्या संशयातून आरोपीने हा खून केल्याचेही तपासात समोर आले आहे.
शेतातच घेतले ताब्यात
घटनेनंतर संशयित सतीश भेंडी घेऊन बैलगाडीने शेजारील गावात विक्रीसाठी गेला. काही वेळाने या भागातील मेंढपाळ पिण्याचे पाणी घेण्यासाठी गेले तेव्हा त्यांना संदीपचा मृतदेह दिसला, त्यानंतर ही घटना उघड झाली. अडावद पोलिसांनी
घटनास्थळी धाव घेतली. घटनेनंतर संशयित काहीही झालेच नाही अशा आविर्भावात वावरत होता. ग्रामस्थांसोबत त्यानेही शेतात धाव घेतली. मात्र, पोलिसांनी चौकशी करताच त्याचे पितळ उघडे पडले. शेतातच संशयिताला पोलिसांनी ताब्यात घेतले.
