जळगाव (प्रतिनिधी) सुनील झंवर हे माझ्यासह सर्वच राजकीय पक्षाच्या नेत्यांचे निकटवर्तीय आहेत. माझ्याकडे कुणी नाही म्हणून दाखवावं ? असे वक्तव्य शुक्रवारी माजी मंत्री आ. गिरीश महाजन यांनी केले होते. अगदी पोलिसांनी देखील सुनिल झंवर हा प्रभावशाली व्यक्तिंच्या जवळचा असून आर्थिक व राजकीयदृष्ट्या सुध्दा प्रभावशाली आहे, असे दोषारोप पत्रात म्हटलेय. तसेच पुर्वनियोजीत कटाची रुपरेषा मांडताना पोलिसांनी सर्व संशयितांची बीएचआर घोटाळ्यात नेमकी भूमिका काय होती?, ती स्पष्ट केली आहे.
दोषारोप पत्रानुसार पुर्वनियोजीत कटाची रुपरेषा
तपासात असे निष्पन्न झाले की, सुरुवातीला जितेद्र कंडारे, महावीर जैन, ठाकरे, सुजित वाणी, सुनिल झंवर, सुरज झंवर व धरम साखला या संशयित आरोपींनी गैरहेतुने बीएचआर संस्थेतील मालमत्ता व ठेवीदारांच्या पैशाचा अपहार करण्याचा गुप्त कट रचला. सदरच्या गुप्त कटात त्यांनी एक विचाराने गैरकृत्य व गैरमार्ग अवलंबवून बीएचआरच्या मालमत्ता व ठेवीदारांच्या पैसा अपहार करायचा, यासाठी संशयित आरोपींनी अनेक गैरकृत्य केली व भा.द.वि.चे कलम १२० (ब) प्रमाणे गुन्हा केला.
तपासात असे निष्पन्न झाले की, सदरचा पुर्वनियोजीत कट हा जरी वरील संशयित आरोपींनी केलेला असला तरीसुध्दा सदरच्या गुप्त कटामध्ये वेळोवेळी इतरही आरोपी सहभागी होवून त्यांनी सदरचा पुर्वनियोजीत कट अंमलात आणण्यासाठी महत्वाची भूमिका प्रत्यक्ष कृती करून बजावलेली आहे. यात कुणाल शहा, प्रकाश वाणी, विकास चोरडीया, अनिल पगारीया या व्यक्तींनी सहभागी होवून प्रत्यक्ष कृती करुन गुप्त कट अंमलात आणलेला आहे.
तपासात असेही निष्पन्न झाले की, जितेंद्र कंडारे, सुनिल झंवर, महावीर जैन या अत्यंत प्रभावशाली व्यक्ती होत्या. बीएचआरचा अवसायक संशयित आरोपी जितेंद्र कंडारे व संशयित आरोपी सुजित वाणी हे एकमेकांचे चांगले परिचयाचे आहेत. जितेंद्र कंडारे हा यापूर्वी सिद्धी व्यंकटेश सहकारी बँक जळगाव येथे अवसायक असताना सुजित वाणी हा तेथे कॅशीअरचे काम करीत होता. प्रमोद माळी हा बीएचआरमध्ये पूर्वीपासूनच व्यवस्थापक म्हणून नोकरीस होता व त्याला व्यवहाराची संपूर्ण कल्पना होती. तर संशयित आरोपी धरम साखला हा बीएचआरचा सन २००८ पर्यंत सनदी लेखापाल तर सन २००३ ते २०१४ पर्यंत टॅक्स ऑडीटर म्हणून कार्यरत होता. तसेच धरम साखला याचा पार्टनर निरज कासट याने सन २०१२ ते २०१४ पर्यंत बीएचआरचे लेखापरिक्षणही केले आहे.
धरम साखला याचा भाऊ योगेश साखला याने टॅक्स भरण्याचे कामकाज केलेले आहे. योगेश साखला व धरम साखला यांचे कार्यालय एकच आहे. संशयित आरोपी महावीर जैन हा जळगावातील एमआयडीसीचे संदर्भात कामे करतो. तसेच बीएचआरचे कार्यालय देखील एमआयडीसी येथे असल्याने महावीर जैन व जितेंद्र कंडारे यांची ओळख व संबंध होते. महावीर जैन याच्या पत्नीचा भाऊ आकाश कांकरीया याचा मित्र सुरज झंवर व त्याचे वडील सुनिल झंवर यांच्याकडे महावीर जैनचे जाणे-येणे होते. तर ठाकरेदेखील बीएचआर व कंडारेशी सुरूवातीपासूनच संलग्न होता.
तपासात असेही निष्पन्न झाले की, धरम साखला याला बीएचआरच्या व्यवहारांची, ठेवीदार, कर्जदार, मालमत्ता, बेनामी ठेवीदारांची तो टॅक्स ऑडीटर असल्याने माहिती होती. तपासात असेही निष्पन्न झाले आहे की, सुनिल झंवर हा प्रभावशाली व्यक्तिंच्या जवळचा असून आर्थिकदृष्ट्या व राजकियदृष्ट्या सुध्दा प्रभावशाली होता. तसेच प्रकाश वाणी याने मंत्रालयात व शासकिय यंत्रणेत मोठया पदावर काम केल्याने तो सुध्दा प्रभावशाली होता.
