चाळीसगाव (प्रतिनिधी) लग्नाचे आमिष दाखवून तरुणीवर वारंवार लैंगिक शोषण करणाऱ्या नेवासा पोलीस ठाण्याच्या पोलीस उपनिरीक्षका विरोधात गुन्हा दाखल करण्यात आला आहे. समाधान वसंत भाटेवाल असे या पोलीस उपनिरीक्षकाचे नाव आहे.
नेवासा शहर पोलीस ठाण्यात समाधान भाटेवाल या उपनिरीक्षकावर बलात्कार आणि फसवणुकीचा गुन्हा दाखल करण्यात आला. समाधान यांनी चाळीसगाव तालुक्यातील मेहुणबारा येथील तरुणीला लग्न करण्याचे आमिष देवून तिच्यावर इच्छेविरोधात नाशिक, चाळीसगाव येथे वारंवार तिचा उपभोग घेतला. त्याशिवाय, नाशिक येथे स्वतंत्र रुम भाड्याने घेऊन तेथे देखील लग्नाचे आमिष दाखवून तरुणीवर अत्याचार केला. समाधान भाटेवालने दुसऱ्या मुलीशी लग्नही केले. हा प्रकार उघडकीस आल्यावर तरुणीने जाब विचारला असता तिला जीवे मारण्याची धमकीही दिली. पिडीत तरुणी या पोलीस उपनिरीक्षकाकडे लग्न करण्याची मागणी करत होती. मात्र, वारंवार तिला त्याने नकार दिला आणि दुसऱ्या तरुणीशी लग्न केले, म्हणून चाळीसगाव शहर पोलीस ठाण्यात कलम ३७६ आणि ४२० प्रमाणे गुन्ह्याची नोंद करण्यात आली आहे.
