धरणगाव (प्रतिनिधी) शिवसेना (उद्धव बाळासाहेब ठाकरे) पक्षाच्या वतीने आयोजित जाहीर सभेत पालकमंत्री गुलाबराव पाटील यांच्याविषयी आक्षेपार्ह वक्तव्य करण्यात आले होते. याप्रकरणी युवा सेनेचे महाराष्ट्र प्रचारक शरद कोळी यांच्याविरुद्ध धरणगाव पोलिसात गुन्हा दाखल करण्यात आला होता. आता न्यायालयाच्या आदेशानुसार शरद कोळी हे उद्या (शनिवार) धरणगाव पोलिसात येणार आहेत.
धरणगावात ठाकरे गटाची महाप्रबोधन यात्रेत युवसेनेचे राज्य विस्तारक शरद कोळी यांनी अतिशय आक्षेपार्ह शब्दांमध्ये पालकमंत्री ना. गुलाबराव पाटील यांच्या विरोधात टिका केली होती. यामुळे त्यांनी पालकमंत्र्यांचा अवमान केल्यासह गुजर समाजाच्या भावना दुखावल्या म्हणून धरणगाव पोलीस स्थानकात त्यांच्या विरोधात शिवसेनेचे पदाधिकारी बाळू जाधव यांनी फिर्याद दिली होती. यानुसार भादंवि कलम-२९५ आणि १५३ अन्वये गुन्हा दाखल करण्यात आला होता.
यानंतर शरद कोळी यांच्यावर जिल्हाधिकारी यांनी भाषण करण्यासाठी बंदी लादली होती. गुन्हा दाखल झाल्यानंतर शरद कोळी हे पोलीसांच्या हाती लागले नव्हते. यानंतर त्यांनी जळगाव न्यायालयात अटकपूर्व जामीनासाठी अर्ज दाखल केला होता. कोर्टाने यानंतर त्यांना सशर्त अटकपूर्व जामीन मंजूर केला होता. परंतू श्री. कोळी यांना २६ नोव्हेंबर रोजी धरणगाव पोलिसात हजर राहण्याच्या सूचना करण्यात आल्या होत्या. त्यानुसार श्री. कोळी हे उद्या हजर राहणार आहेत.
धरणगावात झळकले स्वागताचे पोस्टर !
शरद कोळी हे न्यायालयाच्या आदेशानुसार धरणगाव पोलिसात हजर राहणार आहेत. याठिकाणी तपासधिकारी पीएसआय अमोल गुंजाळ हे चौकशीच्या अनुषंगाने वाटल्यास त्यांचा जबाब नोंदवू शकतात. दुसरीकडे शरद कोळी धरणगावात येत असल्यामुळे त्यांचे स्वागताचे फलक धरणगावच्या उड्डाणपुलावर झळकले आहेत.
